புதுச்சேரி சென்டாக்: நீட் மருத்துவப் படிப்புகளுக்கான 2-ஆம் கட்ட உத்தேச சேர்க்கை பட்டியல் வெளியீடு
புதுச்சேரி, 12/9/2026: புதுச்சேரி அரசு உயர்கல்வி மற்றும் தொழில்நுட்பக் கல்வி இயக்ககத்தின் கீழ் செயல்படும் மத்திய சேர்க்கைக் குழு (சென்டாக்), 2026-2027-ஆம் கல்வி ஆண்டிற்கான நீட் (NEET) அடிப்படையிலான இளநிலை மருத்துவப் படிப்புகளின் இரண்டாம் கட்ட உத்தேச ஒதுக்கீட்டுப் பட்டியலை (Round 2 Draft Allotment List) அதிகாரப்பூர்வமாக வெளியிட்டுள்ளது.
எம்.பி.பி.எஸ்., பி.டி.எஸ்., பி.ஏ.எம்.எஸ். மற்றும் பி.வி.எஸ்.சி.&ஏ.எச். ஆகிய தொழில்முறை படிப்புகளில் அரசு ஒதுக்கீடு, நிர்வாக ஒதுக்கீடு, தெலுங்கு சிறுபான்மையினர் மற்றும் என்.ஆர்.ஐ. ஒதுக்கீட்டின் கீழ் உள்ள இடங்களுக்கு இந்த ஒதுக்கீடு நடைபெற்றுள்ளது. மொத்தம் உள்ள 929 இடங்களில், 908 இடங்கள் மாணவர்களுக்கு ஒதுக்கீடு செய்யப்பட்டுள்ளன. இதில் சென்னை உயர் நீதிமன்ற வழக்கு நிலுவையில் உள்ள காரணத்தால் அரசு ஒதுக்கீட்டு எம்.பி.பி.எஸ். பிரிவில் 5 இடங்கள் நிறுத்தி வைக்கப்பட்டுள்ளன மற்றும் 1 இடம் ஒதுக்கப்பட்டுள்ளது.
மத்திய கலந்தாய்வுக் குழு (MCC) மூலம் ஜிப்மர் புதுச்சேரி உள்ளூர் ஒதுக்கீட்டில் இடம் பெற்று, சென்டாக் கலந்தாய்வில் பங்கேற்க விருப்பம் தெரிவிக்காத மாணவர்கள் இந்தப் பட்டியலில் இருந்து நீக்கப்பட்டுள்ளனர். மாணவர்கள் தங்களது லாகின் டேஷ்போர்டு வழியாக சேர்க்கை நிலவரத்தை அறிந்துகொள்ளலாம்.
இந்த உத்தேசப் பட்டியலில் ஏதேனும் ஆட்சேபனைகள் இருந்தால், மாணவர்கள் 13.09.2026 காலை 11.00 மணிக்குள் டேஷ்போர்டில் உள்ள ‘GRIEVANCES’ பிரிவு மூலம் தெரிவிக்க வேண்டும். புகார்கள் பரிசீலிக்கப்பட்ட பிறகு இறுதி தற்காலிக ஒதுக்கீட்டுப் பட்டியல் (Provisional Allotment List) வெளியிடப்படும். இறுதி ஆணை பதிவிறக்கம் செய்த பிறகே மாணவர்கள் கல்லூரிகளுக்குச் செல்ல வேண்டும் என சென்டாக் ஒருங்கிணைப்பாளர் தெரிவித்துள்ளார்.
