வில்லியனூர் திருக்காமேஸ்வரர் கோயில் சிறப்பு அலுவலராக ஆர். திருவரசன் நியமனம்: எம்.எல்.ஏ ப.ரவிக்குமார் ஆணை வழங்கினார்!
புதுச்சேரி:
புதுச்சேரி யூனியன் பிரதேசத்தில் உள்ள புகழ்பெற்ற திருத்தலங்களில் ஒன்றான வில்லியனூர் ஸ்ரீ கோகிலாம்பிகை உடனுறை திருக்காமேஸ்வரர் ஆலயத்தின் புதிய சிறப்பு அலுவலராக திரு. ஆர். திருவரசன் அவர்கள் நியமிக்கப்பட்டுள்ளார். இதற்கான பணி நியமன ஆணையினை வில்லியனூர் தொகுதி சட்டமன்ற உறுப்பினர் ப. ரவிக்குமார் முறைப்படி வழங்கி வாழ்த்து தெரிவித்தார்.
வில்லியனூரில் அமைந்துள்ள சட்டமன்ற உறுப்பினர் அலுவலகத்தில் இதற்கான நிகழ்வு சிறப்பாக நடைபெற்றது. இந்நிகழ்வில் அப்பகுதியைச் சேர்ந்த ஊர் பெரியவர்கள், ஆன்மீக ஆர்வலர்கள் மற்றும் முக்கியப் பிரமுகர்கள் திரளாகக் கலந்துகொண்டனர். சட்டமன்ற உறுப்பினர் ப. ரவிக்குமார் முன்னிலையில் புதிய சிறப்பு அலுவலராக நியமிக்கப்பட்டுள்ள ஆர். திருவரசன் பணி நியமன ஆணையைப் பெற்றுக்கொண்டார்.
வரலாற்றுச் சிறப்புமிக்க இத்திருக்கோயிலின் அன்றாட நிர்வாகப் பணிகள், விழாக்கள் மற்றும் பக்தர்களுக்கான வசதிகள் எவ்விதத் தொய்வுமின்றி சீராக நடைபெற வேண்டும் என்று சட்டமன்ற உறுப்பினர் கேட்டுக்கொண்டார். மேலும், கோயில் திருப்பணிகள் மற்றும் திருவிழாக்களைச் சிறப்புடன் முன்னெடுத்துச் செல்ல அனைத்துத் தரப்பினரும் ஒத்துழைப்பு நல்க வேண்டும் எனவும் அவர் அறிவுறுத்தினார்.
பணி ஆணை வழங்கும் நிகழ்வில் பங்கேற்ற ஊர் முக்கியப் பிரமுகர்கள் மற்றும் பொதுமக்கள் புதிய சிறப்பு அலுவலர் ஆர். திருவரசனுக்கு தங்களது மனமார்ந்த வாழ்த்துகளைத் தெரிவித்தனர். புதுச்சேரி இந்து சமய அறநிலையத்துறையின் வழிகாட்டுதலின்படி, கோயில் வளர்ச்சிப் பணிகளைச் செவ்வனே மேற்கொள்வதாகப் புதிய சிறப்பு அலுவலர் உறுதியளித்தார்.
