புதுச்சேரி அரசுப் பள்ளி மாணவர்களுக்கு விண்வெளி தொழில்நுட்பப் பயிற்சி: ‘மிஷன் ரூமி ட்வின் – 2026’ முகாமில் 748 மாணவ-மாணவியர் பங்கேற்பு!
புதுச்சேரி:
புதுச்சேரி மாநிலப் பள்ளி மாணவர்களிடையே விண்வெளி அறிவியல் மற்றும் செயற்கைக்கோள் தொழில்நுட்பம் குறித்த விழிப்புணர்வை ஏற்படுத்தி, அவர்களின் அறிவியல் ஆர்வத்தை ஊக்குவிக்கும் நோக்கில் ‘மிஷன் ரூமி ட்வின் – 2026’ (Mission Rumi Twin – 2026) என்ற சிறப்புப் பயிற்சி முகாம் வெற்றிகரமாக நடத்தப்பட்டது.
இப்பயிற்சி முகாம் புதுச்சேரி காந்தி வீதியில் அமைந்துள்ள புகழ்பெற்ற பெத்தி செமினார் மேல்நிலைப் பள்ளி வளாகத்தில் செப்டம்பர் 30 மற்றும் அக்டோபர் 1 ஆகிய இரண்டு நாட்கள் முழு வீச்சில் நடைபெற்றது. இதில் புதுச்சேரி பகுதியைச் சேர்ந்த 38 அரசுப் பள்ளிகளைச் சேர்ந்த 748 மாணவ, மாணவியர்கள் மிகுந்த ஆர்வத்துடன் கலந்துகொண்டு விண்வெளி தொழில்நுட்பத்தின் அடிப்படைகள் மற்றும் செயற்கைக்கோள் உருவாக்கம் குறித்து பயின்றனர்.
இப்பயிற்சி முகாமை மார்டின் குழுமம், மார்டின் அறக்கட்டளை, ஸ்பேஸ் ஜோன் இந்தியா, குளோபல் ஹெல்ப் இன்டர்நேஷனல் ஃபவுண்டேஷன் மற்றும் புதுச்சேரி அரசின் பள்ளிக்கல்வி இயக்ககம் ஆகியவை இணைந்து மிகச் சிறப்பான முறையில் ஒருங்கிணைத்து நடத்தின. விண்வெளித் துறையில் வளர்ந்து வரும் அதிநவீன மாற்றங்கள் மற்றும் எதிர்கால வேலைவாய்ப்புகள் குறித்து மாணவர்களுக்கு செயல்முறை விளக்கங்கள் அளிக்கப்பட்டன.
இந்நிகழ்வின் ஒரு பகுதியாக, ஜோஸ் சார்லஸ் மார்ட்டின் மாணவ, மாணவியர்களுடன் காணொலி காட்சி (Video Call) வாயிலாக நேரடியாகக் கலந்துரையாடினார். அப்போது மாணவர்கள் விண்வெளி ஆய்வு, செயற்கைக்கோள் இயக்கம் மற்றும் நவீன தொழில்நுட்பங்கள் குறித்து எழுப்பிய பல்வேறு கேள்விகளுக்கு அவர் பதிலளித்து, அவர்களின் அறிவியல் கனவுகளை மெய்ப்பிக்க வாழ்த்துகளையும் ஊக்கத்தையும் தெரிவித்தார்.
