காரைக்கால் கோட்டுச்சேரிமேட்டில் புதிய கிரிக்கெட் பயிற்சி மைதானம்: எம்எல்ஏ டாக்டர் விக்னேஸ்வரன் திறந்து வைத்தார்!

காரைக்கால்:

காரைக்கால் மாவட்டம், நெடுங்காடு–கோட்டுச்சேரி சட்டமன்றத் தொகுதிக்குட்பட்ட கோட்டுச்சேரிமேடு கிராமத்தில் இளைஞர்கள் மற்றும் வளரும் விளையாட்டு வீரர்களின் பயன்பாட்டிற்காக புதிதாக அமைக்கப்பட்டுள்ள பிரத்யேக கிரிக்கெட் பயிற்சி மைதானம் கோலாகலமாகத் திறந்து வைக்கப்பட்டது.

இப்புதிய கிரிக்கெட் பயிற்சி மைதானத்தை நெடுங்காடு–கோட்டுச்சேரி தொகுதி சட்டமன்ற உறுப்பினரும், மக்கள் மருத்துவருமான டாக்டர் வி. விக்னேஸ்வரன், MBBS., MLA முறைப்படி திறந்து வைத்தார். புதுச்சேரி கிரிக்கெட் சங்கத்தின் (CAP) செயலாளர் திரு. எம். ராமதாஸ் முன்னிலையில் இந்நிகழ்ச்சி மிகச் சிறப்பாக நடைபெற்றது.

கிராமப்புறப் பகுதிகளில் உள்ள திறமை வாய்ந்த இளம் கிரிக்கெட் வீரர்களை அடையாளம் கண்டு, அவர்களின் விளையாட்டுத் திறனை அடித்தள மட்டத்திலிருந்து மேம்படுத்தும் உன்னத நோக்கில் இப்பயிற்சி மைதானம் அமைக்கப்பட்டுள்ளது. இந்நிகழ்வில் கிராமப் பஞ்சாயத்து பிரதிநிதிகள், இளம் கிரிக்கெட் வீரர்கள், விளையாட்டு ஆர்வலர்கள் மற்றும் அப்பகுதி ஊர் பொதுமக்கள் திரளாகக் கலந்துகொண்டனர்.

மைதானத்தைத் திறந்து வைத்துப் பேசிய சட்டமன்ற உறுப்பினர் டாக்டர் வி. விக்னேஸ்வரன், “கிராமப்புற இளைஞர்களின் விளையாட்டுத் திறன்களை ஊக்குவித்து, அவர்களின் எதிர்காலத்தை வளப்படுத்தும் நோக்கில் தொகுதி முழுவதும் விளையாட்டு உள்கட்டமைப்புகள் மேம்படுத்தப்பட்டு வருகின்றன. இளைஞர்கள் விளையாட்டின் மூலம் தங்களது இலக்குகளை அடைய தேவையான அனைத்து ஆதரவும், முழு ஒத்துழைப்பும் தொடர்ந்து வழங்கப்படும்” என்று உறுதியளித்தார்.

கோட்டுச்சேரிமேடு பகுதியில் உருவாக்கப்பட்டுள்ள இந்த புதிய பயிற்சி தளம், அப்பகுதி சுற்றுவட்டார கிராமங்களைச் சேர்ந்த கிரிக்கெட் ஆர்வலர்களுக்கு உயர்தர பயிற்சி பெற்று மாநில மற்றும் தேசிய அளவில் மிளிர்வதற்கு சிறந்த வாய்ப்பாக அமையும் என்று விளையாட்டு வீரர்கள் மகிழ்ச்சி தெரிவித்தனர்.