புதுச்சேரியில் 225 போலீசார் விடிய விடிய அதிரடி வேட்டை: ரவுடிகள் வீடுகளில் சோதனை – 8 பேர் கைது, 116 பேர் மீது நடவடிக்கை!
புதுச்சேரி: புதுச்சேரி மாநிலத்தில் குற்றச் சம்பவங்களைத் தடுக்கவும், சட்டம்-ஒழுங்கைப் பாதுகாக்கவும் காவல்துறை சார்பில் ரவுடிகள் மற்றும் பழைய குற்றவாளிகளின் வீடுகளில் விடிய விடிய அதிரடி சோதனை நடத்தப்பட்டது. இந்த அதிரடி வேட்டையில் 200-க்கும் மேற்பட்ட காவலர்கள் ஒரே நேரத்தில் களமிறங்கி தீவிர சோதனை மேற்கொண்டனர்.
புதுச்சேரி முழுவதும் உள்ள முக்கிய குற்றவாளிகள் மற்றும் சமூக விரோதிகளின் நடமாட்டத்தைக் கட்டுப்படுத்த காவல் உயர் அதிகாரிகளின் உத்தரவின் பேரில் இந்த ஒருங்கிணைந்த தேடுதல் நடவடிக்கை மேற்கொள்ளப்பட்டது. இதில் மொத்தம் 225 காவலர்கள் மற்றும் காவல் அதிகாரிகள் தனித்தனி குழுக்களாகப் பிரிந்து, பல்வேறு பகுதிகளில் உள்ள ரவுடிகளின் வீடுகளுக்கு நேரடியாகச் சென்று திடீர் ஆய்வு நடத்தினர்.
இந்த அதிரடி சோதனையின் போது பல்வேறு வழக்குகளில் தேடப்பட்டு வந்த 8 ரவுடிகள் கைது செய்யப்பட்டனர். மேலும், நீண்ட நாட்களாக நீதிமன்றத்தில் ஆஜராகாமல் தலைமறைவாக இருந்த 10 பேருக்கு எதிராக பிடியாணை (Warrant) பிறப்பிக்கப்பட்டு நடவடிக்கை எடுக்கப்பட்டது. அதேபோல் குற்றச் செயல்களில் ஈடுபட வாய்ப்புள்ள 116 பேர் மீது முன்னெச்சரிக்கை நடவடிக்கைகள் மேற்கொள்ளப்பட்டு அவர்களிடமிருந்து பிரமாணப் பத்திரங்கள் பெறப்பட்டுள்ளன.
புதுச்சேரி நகர் மற்றும் கிராமப்புறப் பகுதிகளில் குற்றங்களை அறவே ஒழிக்கவும், பொதுமக்களின் பாதுகாப்பை உறுதி செய்யவும் இதுபோன்ற தீவிர வாகன சோதனைகள் மற்றும் ரவுடிகள் மீதான அதிரடி கண்காணிப்பு நடவடிக்கைகள் தொடர்ந்து தீவிரப்படுத்தப்படும் என்று காவல்துறை தரப்பில் எச்சரிக்கை விடுக்கப்பட்டுள்ளது.
