புதுச்சேரி அரசுப் பள்ளி இயற்பியல் ஆசிரியர் எஸ். கணேசனுக்கு தேசிய நல்லாசிரியர் விருது: மத்திய கல்வி அமைச்சகம் பாராட்டு!
புதுச்சேரி: புதுச்சேரி மேட்டுப்பாளையத்தில் அமைந்துள்ள விடுதலை வீரர் ஆர். சீனுவாசன் அரசு உயர்நிலைப் பள்ளியின் இயற்பியல் ஆசிரியர் எஸ். கணேசனுக்கு மத்திய அரசின் தேசிய நல்லாசிரியர் விருது அறிவிக்கப்பட்டுள்ளது. புதுமையான அறிவியல் கற்பித்தல், ஸ்டெம் (STEM) செயல்முறைக் கல்வி மற்றும் செயற்கை நுண்ணறிவு (AI) சார்ந்த நவீன கற்பித்தல் முறைகளைச் சிறப்பாகச் செயல்படுத்தியதற்காக அவருக்கு இந்த உயரிய கௌரவம் வழங்கப்பட்டுள்ளது.
கடினமான அறிவியல் கோட்பாடுகளை மாணவர்கள் எளிதில் புரிந்து கொள்ளும் வகையில், நாடகம் மற்றும் கதைகூறல் உத்திகளை உள்ளடக்கிய ‘அறிவியல் நாடக ஒருங்கிணைப்பு மாதிரி’ (Science Theatre Integration Model) என்ற தனித்துவமான முறையை ஆசிரியர் கணேசன் உருவாக்கினார். மேலும், ஏஐ தொழில்நுட்பம், டிஜிட்டல் கல்வி வளங்கள் மற்றும் நேரடி செய்முறை அறிவியல் ஆய்வகம் வாயிலாக வகுப்பறை கற்றலை மிகச் சிறந்த அனுபவமாக இவர் மாற்றியுள்ளார்.
இவரது சீரிய வழிகாட்டுதலின் கீழ் அரசுப் பள்ளி மாணவர்கள் சர்வதேச அளவில் ‘மேக் சயின்ஸ் பாரிஸ்’ திட்டம், 23 தேசிய குழந்தைகள் அறிவியல் மாநாட்டுத் திட்டங்கள், இஸ்ரோவின் ‘யுவிகா’ திட்டம், இன்ஸ்பயர் மனக் (INSPIRE MANAK) மற்றும் என்.எம்.எம்.எஸ் (NMMS) ஆகிய முக்கியக் கல்வித் தளங்களில் தேர்வாகி சாதனை படைத்துள்ளனர். தேசிய மற்றும் மாநில அளவிலான முதன்மைக் கருத்தாளராகப் பணியாற்றி, ஆசிரியர்களுக்கு டிஜிட்டல் மற்றும் நவீன கற்பித்தல் பயிற்சிகளையும் இவர் வழங்கி வருகிறார்.
