தமிழகத்தில் நிலம் வைத்துள்ள புதுச்சேரி, காரைக்கால் விவசாயிகளின் கடனை தள்ளுபடி செய்க: முதல்வர் ரங்கசாமி கடிதம்
புதுச்சேரி: தமிழக எல்லைப் பகுதிகளில் விவசாய நிலம் வைத்துள்ள புதுச்சேரி மற்றும் காரைக்கால் பகுதியைச் சேர்ந்த விவசாயிகளின் பயிர்க் கடன்களையும் தள்ளுபடி செய்ய நடவடிக்கை எடுக்க வேண்டும் என்று புதுச்சேரி முதலமைச்சர் ந.ரங்கசாமி கடிதம் வாயிலாகக் கோரிக்கை விடுத்துள்ளார்.
புதுச்சேரி மற்றும் காரைக்கால் பிராந்தியங்களைச் சேர்ந்த ஏராளமான விவசாயிகள், தமிழகத்தின் அண்டை மாவட்ட எல்லைப் பகுதிகளில் விவசாய நிலங்களை உடமையாகக் கொண்டு பயிர் சாகுபடி செய்து வருகின்றனர். அவர்கள் தமிழகத்தில் உள்ள தொடக்க வேளாண்மை கூட்டுறவு வங்கிகள் மற்றும் வணிக வங்கிகளில் பயிர்க் கடன் பெற்று விவசாயம் மேற்கொண்டு வரும் நிலையில், தமிழக அரசு அறிவிக்கும் கடன் தள்ளுபடி சலுகைகள் இவர்களுக்கும் முழுமையாகக் கிடைக்க வேண்டும் என்ற கோரிக்கை எழுந்துள்ளது.
இதுதொடர்பாக அனுப்பப்பட்டுள்ள கடிதத்தில், புதுச்சேரி மற்றும் காரைக்கால் விவசாயிகளின் வாழ்வாதார நலனைக் கருத்தில் கொண்டு, தமிழகத்தில் உள்ள அவர்களின் நிலங்களுக்கான பயிர்க் கடன்களையும் தள்ளுபடி திட்டத்தின் கீழ் சேர்த்து உரிய நிவாரணம் வழங்கிட வேண்டும் என்று வலியுறுத்தப்பட்டுள்ளது. இந்த நடவடிக்கை எல்லைப் பகுதி விவசாயிகளுக்கு பெரும் நிம்மதியை அளிக்கும் என எதிர்பார்க்கப்படுகிறது.
