புதுச்சேரி – வேளாங்கண்ணி சிறப்பு ரயிலுக்கு பயணிகள் அமோக வரவேற்பு: தினசரி ரயிலாக இயக்க கோரிக்கை!
புதுச்சேரி: புதுச்சேரியிலிருந்து நாகப்பட்டினம் வழியாக வேளாங்கண்ணிக்கு இயக்கப்பட்டு வரும் சிறப்பு ரயிலுக்கு (வண்டி எண்: 06133) மக்களிடையே அமோக வரவேற்பு கிடைத்துள்ளது. வேளாங்கண்ணி திருவிழா மற்றும் ஆன்மீகப் பயணங்களை முன்னிட்டு இயக்கப்படும் இந்த ரயிலில், கடந்த காலங்களை விட பயணிகள் வருகை பல மடங்கு அதிகரித்துள்ளது.
இந்த சிறப்பு ரயிலின் அனைத்து பெட்டிகளிலும் பயணிகள் கூட்டம் நிரம்பி வழிந்தது. கூட்ட நெரிசல் அதிகமாக இருந்த காரணத்தால், ஏராளமான பயணிகள் அமர இடமின்றியும், நின்றுகொண்டும் பயணம் செய்ய வேண்டிய நிலை ஏற்பட்டது. மயிலாடுதுறை முதல் நாகப்பட்டினம் வரை ரூ.55 கட்டணமாக வசூலிக்கப்படும் இந்த ரயிலில் பயணிகளின் பாதுகாப்பு கருதி விழிப்புணர்வும் ஏற்படுத்தப்பட்டு வருகிறது.
பயணிகளிடையே கிடைத்துள்ள இந்த அதீத வரவேற்பைத் தொடர்ந்து, புதுச்சேரி – நாகப்பட்டினம் – வேளாங்கண்ணி சிறப்பு ரயிலை நிரந்தர தினசரி பயணிகள் ரயிலாக இயக்க வேண்டும் என்ற கோரிக்கை வலுத்துள்ளது. தற்போது சிறப்பு ரயிலாக இயக்கப்படுவதால் கட்டணம் சற்று அதிகமாக உள்ளதாகவும், இதனை வழக்கமான தினசரி ரயிலாக மாற்றினால் பயணக் கட்டணம் குறைந்து பொதுமக்களுக்கு பெரும் பயனளிக்கும் என்றும் பயணிகள் தெரிவித்துள்ளனர்.
