கூட்டுறவு வங்கிகளில் ரூ.75 ஆயிரம் வரை பயிர்க்கடன் முழு தள்ளுபடி: சட்டப்பேரவையில் முதல்வர் அறிவிப்பு!
சென்னை:
கூட்டுறவு வங்கிகளில் ரூ.75 ஆயிரம் வரை பயிர்க்கடன் பெற்றுள்ள சிறு மற்றும் குறு விவசாயிகளின் கடன் தொகை முழுமையாகத் தள்ளுபடி செய்யப்படும் என்று முதலமைச்சர் ச. ஜோசப் விஜய் சட்டப்பேரவையில் அறிவித்துள்ளார்.
தமிழ்நாடு சட்டப்பேரவையில் விதி எண் 110-ன் கீழ் அறிக்கை வாசித்த அவர், விவசாயிகளின் கடன் சுமையைக் குறைக்கும் வகையில் இந்த முக்கிய நடவடிக்கை மேற்கொள்ளப்படுவதாகத் தெரிவித்தார். இந்தத் திட்டத்தின் வாயிலாக மாநிலம் முழுவதும் சுமார் 14.43 லட்சம் சிறு மற்றும் குறு விவசாயிகள் நேரடியாகப் பயனடைவார்கள். இத்திட்டத்திற்காக அரசு சார்பில் ரூ.5,932 கோடி நிதி ஒதுக்கீடு செய்யப்பட்டுள்ளது.
மேலும், ரூ.75 ஆயிரத்துக்கும் மேல் பயிர்க்கடன் பெற்றுள்ள சிறு மற்றும் குறு விவசாயிகளுக்கு ரூ.75 ஆயிரம் வரை கடன் தள்ளுபடி சலுகை வழங்கப்படும் என்றும், மீதமுள்ள நிலுவைத் தொகையை சம்பந்தப்பட்ட விவசாயிகள் செலுத்த வேண்டும் என்றும் தெரிவிக்கப்பட்டுள்ளது.
விவசாயிகளின் தற்போதைய பொருளாதார நெருக்கடியைத் தணித்து, அவர்கள் அடுத்தகட்ட சாகுபடிப் பணிகளைத் தடையின்றித் தொடங்குவதற்குத் தேவையான நிதி ஆதரவை வழங்குவதே இக்கடன் தள்ளுபடியின் முக்கிய நோக்கம் என்று அரசு வட்டாரங்கள் தெரிவித்துள்ளன.
