பூவம் அரசு தொடக்கப் பள்ளியில் ஆசிரியர் தின விழா: ஆசிரியர்களுக்கு எம்.எல்.ஏ. டாக்டர் விக்னேஸ்வரன் பாராட்டு!
காரைக்கால்: காரைக்கால் மாவட்டம் நெடுங்காடு தொகுதிக்குட்பட்ட பூவம் அரசு தொடக்கநிலைப் பள்ளியில் ஆசிரியர் தின விழா மற்றும் ஆசிரியர்களுக்கான பாராட்டு விழா விமரிசையாக நடைபெற்றது. பெற்றோர் ஆசிரியர் கழகம் (PTA) மற்றும் பள்ளி மேலாண்மைக் குழு (SMC) சார்பில் இந்த சிறப்பு நிகழ்ச்சி ஏற்பாடு செய்யப்பட்டிருந்தது.
இவ்விழாவில் நெடுங்காடு தொகுதி சட்டமன்ற உறுப்பினரும் மக்கள் மருத்துவருமான டாக்டர் V. விக்னேஸ்வரன் எம்.பி.பி.எஸ்., சிறப்பு அழைப்பாளராகக் கலந்துகொண்டார். அப்போது மாணவர்களின் எதிர்காலத்தை வடிவமைக்கும் மகத்தான கல்விப் பணியில் தங்களை அர்ப்பணித்துக் கொண்டுள்ள ஆசிரியர்களுக்கு அவர் சால்வை அணிவித்து, வாழ்த்துகளையும் பாராட்டுகளையும் தெரிவித்தார்.
இந்நிகழ்வில் பள்ளித் தலைமை ஆசிரியர், பள்ளி நிர்வாகிகள், பெற்றோர் ஆசிரியர் கழகப் பிரதிநிதிகள், பள்ளி மேலாண்மைக் குழு உறுப்பினர்கள், பெற்றோர்கள் மற்றும் பொதுமக்கள் உள்ளிட்ட ஏராளமானோர் கலந்துகொண்டனர். ஆசிரியர்களின் தன்னலமற்ற சேவையைப் போற்றும் வகையில் நடைபெற்ற இவ்விழா பள்ளி வளாகத்தில் மிகுந்த உற்சாகத்துடன் அமைந்தது.
