ஆரோமாத்ரி 2026: ஆரோவிலில் டாக்டர் வர்ஷா குழுவினரின் சிலிர்க்க வைக்கும் ‘எக்ஸ்பிரஷன் ஆஃப் தேவிஸ்’ நாட்டிய நிகழ்ச்சி!
புதுச்சேரி: சர்வதேச நகரியமான ஆரோவிலில் நடைபெற்று வரும் புகழ்பெற்ற ‘ஆரோமாத்ரி 2026’ (AuroMatri 2026) கலை மற்றும் ஆன்மீகத் திருவிழாவின் 9-வது நாள் நிகழ்வு பார்வையாளர்களை வெகுவாகக் கவர்ந்தது. அன்றைய தினத்தின் முக்கிய அம்சமாக டாக்டர் வர்ஷா மற்றும் ஆரோவிலைச் சேர்ந்த அவரது குழுவினர் மேடையேற்றிய ‘எக்ஸ்பிரஷன் ஆஃப் தேவிஸ்’ (Expression of Devis) பாரம்பரிய நாட்டிய நிகழ்ச்சி கலை ஆர்வலர்களிடையே பெரும் வரவேற்பைப் பெற்றது.
ஆரோவில் சர்வதேச நகரியத்தில் ஆண்டுதோறும் ஆன்மீகம், கலாச்சாரம் மற்றும் கலை வடிவங்களை ஒருங்கிணைக்கும் வகையில் ஆரோமாத்ரி திருவிழா விமர்சையாக நடத்தப்பட்டு வருகிறது. பல்வேறு மாநிலங்கள் மற்றும் நாடுகளைச் சேர்ந்த கலைஞர்கள் இதில் பங்கேற்றுத் தங்களது திறமைகளை வெளிப்படுத்தி வருகின்றனர். அந்த வகையில் 9-வது நாள் அரங்கில் தேவியரின் பல்வேறு அவதாரங்கள், சக்தி மற்றும் அமைதியை வெளிப்படுத்தும் வகையில் இந்த நாட்டிய வடிவம் அமைக்கப்பட்டிருந்தது. டாக்டர் வர்ஷா தலைமையிலான நாட்டியக் குழுவினர் தங்களின் நேர்த்தியான தாள லயம், பாவங்கள் மற்றும் அபார முக பாவனைகள் மூலம் மேடையில் அசத்தலான முத்திரையைப் பதித்தனர்.
தெய்வங்களின் வீரம் மற்றும் கருணையை வெளிப்படுத்திய ஒவ்வொரு அசைவும், தாளக் கட்டும் பார்வையாளர்களை மெய்சிலிர்க்க வைத்தது. அரங்கில் திரண்டிருந்த பார்வையாளர்கள் கலைஞர்களின் ஈடுபாட்டையும் அர்ப்பணிப்புடனான நாட்டியத்தையும் கரவொலி எழுப்பிப் பாராட்டினர். புதுச்சேரி மற்றும் ஆரோவில் சுற்றுவட்டாரப் பகுதிகளைச் சேர்ந்த பொதுமக்கள், வெளிநாட்டுச் சுற்றுலாப் பயணிகள் எனப் பலரும் திரளாகக் கலந்துகொண்டு இந்த கலை நிகழ்வைக் கண்டு ரசித்தனர். பாரம்பரிய கலை மற்றும் நடன வடிவங்களின் மேன்மையை அடுத்த தலைமுறைக்கு எடுத்துரைக்கும் வகையில் இத்தகைய நிகழ்ச்சிகள் பெரும் பங்காற்றுவதாக விழா அமைப்பாளர்கள் நெகிழ்ச்சியுடன் தெரிவித்தனர்.
