திருச்சியில் கடந்த 2 மணி நேரமாக இடி, மின்னலுடன் வெளுத்து வாங்கும் கனமழை: ஸ்தம்பித்த போக்குவரத்து!
திருச்சி: திருச்சி மாநகர் மற்றும் அதன் சுற்றுவட்டாரப் பகுதிகளில் கடந்த இரண்டு மணி நேரத்திற்கும் மேலாக இடி, மின்னலுடன் கூடிய பலத்த கனமழை தொடர்ந்து பெய்து வருகிறது. இதனால் நகரின் முக்கிய சாலைகளில் மழைநீர் பெருக்கெடுத்து ஓடுவதால் மக்களின் இயல்பு வாழ்க்கை கடுமையாக பாதிக்கப்பட்டுள்ளது.
திருச்சியில் இன்று மாலை திடீரென வானில் கருமேகங்கள் திரண்டு, பலத்த காற்று மற்றும் இடி மின்னலுடன் கூடிய கனமழை கொட்டித் தீர்க்கத் தொடங்கியது. குறிப்பாக திருச்சி மத்திய பேருந்து நிலையம், சத்திரம் பேருந்து நிலையம், தில்லை நகர், கே.கே.நகர், பாலக்கரை, காந்தி மார்க்கெட் மற்றும் உறையூர் உள்ளிட்ட மாநகரின் பல்வேறு முக்கிய பகுதிகளில் இடைவிடாது பெய்து வரும் மழையால் தாழ்வான பகுதிகளில் தண்ணீர் தேங்கத் தொடங்கியுள்ளது.
கடந்த இரண்டு மணி நேரமாக கொட்டித் தீர்த்து வரும் இந்தத் தொடர் கனமழை காரணமாக, சாலைகளில் மழைநீர் வெள்ளம்போல் பெருக்கெடுத்து ஓடுகிறது. இதன் காரணமாக இருசக்கர வாகன ஓட்டிகள் மற்றும் பாதசாரிகள் பெரும் சிரமத்திற்கு ஆளாகியுள்ளனர். மாலை வேளையில் பணி முடிந்து வீடு திரும்புவோரும், பொதுமக்களும் மழையில் சிக்கித் தவித்து வருகின்றனர். பிரதான சாலைகளில் வாகனங்கள் மிக மெதுவாக ஊர்ந்து செல்வதால் பல இடங்களில் போக்குவரத்து நெரிசல் ஏற்பட்டுள்ளது.
கடந்த சில தினங்களாக திருச்சி மற்றும் அதன் சுற்றுவட்டாரப் பகுதிகளில் பகல் நேரங்களில் வெயிலின் தாக்கம் அதிகமாகக் காணப்பட்ட நிலையில், தற்போது பெய்து வரும் இந்தத் திடீர் கனமழை வெப்பத்தைத் தணித்து குளிர்ந்த சூழலை ஏற்படுத்தியுள்ளது. இருப்பினும், நகர்ப்புறப் பகுதிகளில் தொடர்ந்து பெய்து வரும் மழையின் தீவிரத்தைக் கருத்தில் கொண்டு, மழைநீர் தேங்காமல் உடனடியாக வெளியேற்ற மாநகராட்சி மற்றும் உள்ளாட்சி அமைப்புகள் உரிய முன்னெச்சரிக்கை நடவடிக்கைகளை மேற்கொள்ள வேண்டும் என பொதுமக்கள் கோரிக்கை விடுத்துள்ளனர்.
