புதுச்சேரியில் ‘விக்சித் பாரத் இளம் தலைவர்கள் கலந்துரையாடல்’: வெற்றி பெற்றவர்களுக்கு அமைச்சர் ஜி.என்.எஸ். ராஜசேகரன் பரிசளிப்பு!
புதுச்சேரி: புதுச்சேரியில் மாவட்ட அளவில் நடைபெற்ற ‘விக்சித் பாரத் இளம் தலைவர்கள் கலந்துரையாடல்’ போட்டியில் வெற்றி பெற்ற மாணவ, மாணவிகளுக்கு விளையாட்டு மற்றும் இளைஞர் நலத்துறை அமைச்சர் ஜி.என்.எஸ். ராஜசேகரன் பரிசுகளையும் சான்றிதழ்களையும் வழங்கிப் பாராட்டினார்.புதுச்சேரி யூனியன் பிரதேசத்தில் இளைஞர்களின் தலைமைப் பண்பை வளர்க்கும் நோக்கிலும், நாட்டின் தொலைநோக்கு வளர்ச்சித் திட்டங்களில் இளைஞர்களின் பங்களிப்பை உறுதி செய்யும் வகையிலும் மாவட்ட அளவிலான ‘விக்சித் பாரத் இளம் தலைவர்கள் கலந்துரையாடல்’ (Viksit Bharat Young Leaders Dialogue) நிகழ்ச்சி சிறப்புடன் நடத்தப்பட்டது.
இதில் பல்வேறு கல்வி நிறுவனங்களைச் சேர்ந்த ஏராளமான கல்லூரி மாணவர்கள் மற்றும் இளைஞர்கள் ஆர்வமுடன் கலந்துகொண்டு தங்களது தனித்துவமான கருத்துகளையும் ஆக்கப்பூர்வமான திட்டங்களையும் வெளிப்படுத்தினர்.இந்நிகழ்ச்சியில் சிறப்பாகச் செயல்பட்டு மாவட்ட அளவில் வெற்றி பெற்றவர்களுக்குப் பரிசளிக்கும் விழா நடைபெற்றது. இதில் விளையாட்டு மற்றும் இளைஞர் நலத்துறை அமைச்சர் திரு. ஜி.என்.எஸ். ராஜசேகரன் சிறப்பு விருந்தினராகக் கலந்துகொண்டு, போட்டிகளில் முதல் மற்றும் அடுத்தடுத்த இடங்களைப் பிடித்த வெற்றியாளர்களுக்குக் கேடயங்கள், சான்றிதழ்கள் மற்றும் பரிசுகளை வழங்கி வாழ்த்து தெரிவித்தார்.அப்போது பேசிய அமைச்சர், நாளைய பாரதத்தை வழிநடத்தும் பேராற்றல் படைத்தவர்களாக இன்றைய இளைஞர்கள் உருவெடுக்க வேண்டும் என்றும், கல்வி மற்றும் விளையாட்டோடு இணைந்து தலைமைப் பண்புகளையும் வளர்த்துக்கொள்வது எதிர்கால முன்னேற்றத்திற்கு அவசியமானது என்றும் வலியுறுத்தினார்.
புதுச்சேரி அரசு இளைஞர்களின் கல்வி, விளையாட்டு மற்றும் ஆளுமை வளர்ச்சிக்குத் தொடர்ந்து உறுதுணையாக இருக்கும் என்றும் அவர் குறிப்பிட்டார்.இவ்விழாவில் துறை சார்ந்த உயர் அதிகாரிகள், கல்வி நிறுவனங்களின் ஒருங்கிணைப்பாளர்கள் மற்றும் ஏராளமான இளைஞர்கள் கலந்துகொண்டனர். வெற்றி பெற்ற இளம் தலைவர்கள் மாநில மற்றும் தேசிய அளவிலான அடுத்தகட்ட போட்டிகளில் பங்கேற்பதற்கான வாழ்த்துகளையும் அதிகாரிகள் தெரிவித்தனர்.
