புதுச்சேரியில் அசிஸ்டென்ட் பதவி உயர்வுக்கான LDCE தேர்வு தேதி அறிவிப்பு: அரசு செயலர் சுற்றறிக்கை!
புதுச்சேரி, செப். 30: புதுச்சேரி அரசுத் துறைகளில் காலியாக உள்ள அசிஸ்டென்ட் (Assistant) பணியிடங்களுக்கான வரையறுக்கப்பட்ட துறை அளவிலான போட்டித் தேர்வு (LDCE) வரும் அக்டோபர் 24-ஆம் தேதி சனிக்கிழமை நடைபெறும் என்று அரசு பணியாளர் மற்றும் நிர்வாகச் சீர்திருத்தத்துறை (DP&AR) அதிகாரப்பூர்வமாக அறிவித்துள்ளது.
இது தொடர்பாக புதுச்சேரி அரசின் பணியாளர் மற்றும் நிர்வாகச் சீர்திருத்தத் துறை (பணியாளர் பிரிவு) சார்புச் செயலாளர் எஸ். முருகேசன் வெளியிட்டுள்ள அறிவிப்பில் கூறியிருப்பதாவது:
புதுச்சேரி அரசின் பல்வேறு துறைகளில் பணியாற்றும் ஊழியர்களுக்கு அசிஸ்டென்ட் பதவி உயர்வு வழங்குவதற்கான ‘வரையறுக்கப்பட்ட துறை அளவிலான போட்டித் தேர்வு 2026’ (Limited Departmental Competitive Examination – LDCE) புதுச்சேரி பிராந்தியத்தில் அக்டோபர் 24-ஆம் தேதி (சனிக்கிழமை) இரு அமர்வுகளாக நடத்தப்பட உள்ளது.
இத்தேர்வின் முதல் தாள் (Paper-I) காலை 10.00 மணி முதல் நண்பகல் 12.00 மணி வரையிலும், இரண்டாம் தாள் (Paper-II) பிற்பகல் 2.00 மணி முதல் மாலை 5.00 மணி வரையிலும் நடைபெறும். இத்தேர்வுக்கான விரிவான பாடத்திட்டம் (Syllabus) பணியாளர் மற்றும் நிர்வாக சீர்திருத்தத் துறையின் அதிகாரப்பூர்வ இணையதளத்தில் (https://dpar.py.gov.in) சுற்றறிக்கை பிரிவில் பதிவேற்றம் செய்யப்பட்டுள்ளது.
மேலும், இத்தேர்வு நடைபெறும் தேர்வு மையங்களின் விவரங்கள் தேர்வர்களுக்கு விரைவில் வழங்கப்பட உள்ள ஹால் டிக்கெட்டுகளில் (Hall Tickets) குறிப்பிடப்படும் எனவும், தேர்வர்கள் அதிகாரப்பூர்வ இணையதளத்தைப் பார்வையிட்டு தகவல்களைத் தெரிந்துகொள்ளுமாறும் அந்த அறிவிப்பில் தெரிவிக்கப்பட்டுள்ளது.
