புதுச்சேரியில் போக்குவரத்து மேலாண்மை மற்றும் சட்டம் ஒழுங்கு: உள்துறை அமைச்சர் நமச்சிவாயம் தலைமையில் உயர் அதிகாரிகள் ஆலோசனைக் கூட்டம்!
புதுச்சேரி: புதுச்சேரி யூனியன் பிரதேசத்தில் போக்குவரத்து நெரிசலை முறைப்படுத்துவது மற்றும் சட்டம் ஒழுங்கு பாதுகாப்பு நடவடிக்கைகள் தொடர்பாக, மாண்புமிகு உள்துறை அமைச்சர் ஆ. நமச்சிவாயம் தலைமையில் முக்கிய ஆலோசனைக் கூட்டம் நடைபெற்றது. புதுச்சேரி நகரப் பகுதிகள் மற்றும் புறநகர்ப் பகுதிகளில் நாளுக்கு நாள் அதிகரித்து வரும் வாகனப் போக்குவரத்து நெரிசலைச் சீரமைப்பது குறித்து இக்கூட்டத்தில் விரிவாக விவாதிக்கப்பட்டது.
இக்கூட்டத்தில், புதுச்சேரி போக்குவரத்துப் பிரிவு முதுநிலை காவல் கண்காணிப்பாளர் (SSP) திருமதி திவ்யா ஐ.பி.எஸ்., தென்மேற்கு போக்குவரத்துப் பிரிவு காவல் கண்காணிப்பாளர் திரு. பக்தவச்சலம் மற்றும் கிழக்குப் போக்குவரத்துக் காவல் நிலைய ஆய்வாளர் திரு. வெங்கடாசலபதி உள்ளிட்ட காவல் துறை உயரதிகாரிகள் நேரில் கலந்து கொண்டனர்.
நகரப் பகுதியில் பள்ளி, கல்லூரி நேரங்களிலும், வணிகப் பகுதிகளிலும் பொதுமக்களுக்கு எவ்வித இடையூறும் இன்றி சீரான வாகனப் போக்குவரத்தை உறுதி செய்வது குறித்து உள்துறை அமைச்சர் அதிகாரிகளுடன் ஆய்வு செய்தார். குறிப்பாக வார இறுதி நாட்களில் வெளிமாநில சுற்றுலாப் பயணிகளின் வருகை பெருமளவில் அதிகரிப்பதால், அதற்கேற்ப கூடுதல் வாகன நிறுத்துமிடங்களை (Parking Facilities) உருவாக்குவது மற்றும் போக்குவரத்து மாற்றங்களை முறையாக அமல்படுத்துவது குறித்து விவாதிக்கப்பட்டது.
ஏற்கனவே புதுச்சேரியில் போக்குவரத்து விதிமீறல்களில் ஈடுபடுவோர் மீது புதுவை காவல்துறை கடுமையான நடவடிக்கைகளைத் தொடர்ந்து எடுத்து வருகிறது. குறிப்பாக, கடந்த செப்டம்பர் மாதத்தில் மட்டும் அதிவேகப் பயணம், ஹெல்மெட் அணியாமை, தவறான வழியில் வாகனம் இயக்குதல் உள்ளிட்ட பல்வேறு போக்குவரத்து விதிகளை மீறிய 17,672 நபர்கள் மீது அபராத நடவடிக்கை எடுக்கப்பட்டதாக முதுநிலை போலீஸ் கண்காணிப்பாளர் திவ்யா தெரிவித்திருந்தார். இந்த நடவடிக்கைகளின் தொடர்ச்சியாக, தற்போது நகரின் முக்கிய சந்திப்புகளில் விபத்துகளைக் கட்டுப்படுத்தவும், விதிமீறல்களைத் தொடர்ந்து கண்காணிக்கவும் அமைச்சர் உத்தரவிட்டுள்ளார்.
மேலும், சட்டம் ஒழுங்குப் பணிகளோடு இணைந்து போக்குவரத்து காவல்துறையினர் விழிப்புடன் ரோந்துப் பணிகளை மேற்கொள்ள வேண்டும் எனவும், பொதுமக்கள் மற்றும் வாகன ஓட்டிகளுக்குத் தேவையின்றி சிரமம் ஏற்படாத வகையில் சுமூகமான போக்குவரத்து நடைமுறைகளைத் தீவிரப்படுத்த வேண்டும் எனவும் கூட்டத்தில் அமைச்சர் நமச்சிவாயம் அறிவுறுத்தினார்.
