புதுச்சேரியில் நிதி மோசடி மற்றும் தொடர் குற்றங்களில் ஈடுபடுவோர் மீது குண்டர் சட்டம் பாயும்: அமைச்சர் நமச்சிவாயம் கடும் எச்சரிக்கை!
புதுச்சேரி: புதுச்சேரி மாநிலத்தில் தொடர்ந்து குற்றச் செயல்களில் ஈடுபட்டு வருவோர் மற்றும் பொதுமக்களை ஏமாற்றி பண மோசடி செய்வோர் மீது குண்டர் தடுப்புச் சட்டத்தின் கீழ் மிகக் கடுமையான நடவடிக்கை எடுக்கப்படும் என்று மாநில உள்துறை அமைச்சர் ஆ. நமச்சிவாயம் எச்சரித்துள்ளார்.
இது தொடர்பாக அவர் தெரிவிக்கையில், புதுச்சேரியில் பொதுமக்களின் அமைதியான வாழ்விற்கும் அவர்களின் பொருளாதாரப் பாதுகாப்பிற்கும் குந்தகம் விளைவிக்கும் வகையில் தொடர் குற்றங்களில் ஈடுபடுவோரைக் காவல்துறை தீவிரமாகக் கண்காணித்து வருகிறது. குறிப்பாக, தீபாவளி பண்டிகையை முன்னிட்டு நடத்தப்படும் கவர்ச்சிகரமான தீபாவளி சீட்டு மோசடிகள் மற்றும் இளைஞர்களின் எதிர்காலத்தை வீணடிக்கும் அரசு வேலை வாங்கித் தருவதாகக் கூறி பண மோசடி செய்யும் நபர்கள் மீது அரசு தீவிரக் கவனம் செலுத்தி வருகிறது என்றார்.
பொதுமக்களின் உழைப்பைச் சுரண்டும் இத்தகைய தொடர் மோசடிக் குற்றவாளிகள் மீது பொதுநலன் கருதி தயவுதாட்சண்யமின்றி குண்டர் தடுப்புச் சட்டம் பாய்ச்சப்படும் என்றும், பொதுமக்கள் விழிப்புணர்வுடன் இருந்து இத்தகைய மோசடி நபர்களிடம் ஏமாற வேண்டாம் எனவும் அமைச்சர் அறிவுறுத்தியுள்ளார்.
