புதுச்சேரி மத்திய சிறையில் கைதிகளுக்கு கம்ப்யூட்டர் பயிற்சி மற்றும் இயற்கை எரு தயாரிப்பு திட்டம்: துணைநிலை ஆளுநர் கைலாஷ்நாதன் தொடக்கம்!
புதுச்சேரி, அக். 5: புதுச்சேரி காலாப்பட்டில் உள்ள மத்திய சிறைச்சாலையில் கைதிகளின் மறுவாழ்வு மற்றும் திறன் மேம்பாட்டுக்காகப் பல்வேறு புதிய நலத்திட்டங்கள் மற்றும் கட்டமைப்பு வசதிகளைத் துணைநிலை ஆளுநர் கே. கைலாஷ்நாதன் முறைப்படி தொடங்கி வைத்தார்.
சிறைக்கைதிகள் விடுதலைக்குப் பின் நல்வழியில் வாழவும், சுயமாக வேலைவாய்ப்பு பெறவும் உதவும் வகையில் நவீன கணினி பயிற்சி மையம் சிறை வளாகத்தில் அமைக்கப்பட்டுள்ளது. இம்மையத்தை நேரில் பார்வையிட்டுத் தொடங்கி வைத்த துணைநிலை ஆளுநர், கைதிகள் புதிய தொழில்நுட்ப அறிவை வளர்த்துக்கொள்ள வேண்டும் என்று அறிவுறுத்தினார்.
மேலும், சிறை வளாகத்தில் சேகரமாகும் காய்கறி கழிவுகளைக் கொண்டு மறுசுழற்சி முறையில் இயற்கை எரு தயாரிக்கும் புதிய பசுமைத் திட்டத்தையும், நீதிமன்ற விசாரணைகள் மற்றும் உறவினர்களுடன் உரையாடுவதற்கான நவீன காணொளிக் காட்சி (Video Conferencing) கலந்துரையாடல் அறையையும் அவர் திறந்து வைத்தார்.
இந்நிகழ்ச்சியில் சிறைத்துறை உயர் அதிகாரிகள், அரசு அதிகாரிகள் மற்றும் சிறை ஊழியர்கள் பலர் கலந்துகொண்டனர். சிறைவாசிகளின் மனமாற்றத்திற்கும், அவர்களின் வாழ்வாதார மேம்பாட்டிற்கும் இத்தகைய ஆக்கப்பூர்வமான திட்டங்கள் பேருதவியாக இருக்கும் எனத் தெரிவிக்கப்பட்டுள்ளது.
