கல்விக்கும் உழைப்பிற்கும் நன்றி செலுத்தும் நன்னாள்: புதுவை அதிமுக செயலாளர் அன்பழகன் ஆயுத பூஜை வாழ்த்து!
புதுச்சேரி: கல்விக்கும் நாம் செய்யும் தொழிலுக்கும் நன்றி செலுத்துவதே ஆயுத பூஜை மற்றும் சரஸ்வதி பூஜையின் உன்னத நோக்கம் என்று புதுச்சேரி மாநில அதிமுக செயலாளரும் முன்னாள் தற்காலிக சபாநாயகருமான அ. அன்பழகன் தெரிவித்துள்ளார். ஆயுத பூஜை மற்றும் சரஸ்வதி பூஜை திருநாளை முன்னிட்டு அவர் வெளியிட்டுள்ள வாழ்த்துச் செய்தியில், உழைப்பின் மேன்மையையும் கல்வி அறிவின் முக்கியத்துவத்தையும் விரிவாக எடுத்துரைத்துள்ளார். புதுச்சேரி மாநில அதிமுக சார்பில் பொதுமக்கள் அனைவருக்கும் தமது உளமார்ந்த நல்வாழ்த்துகளைப் பகிர்ந்து கொள்வதாக அவர் குறிப்பிட்டுள்ளார்.
இது தொடர்பாக அவர் வெளியிட்டுள்ள வாழ்த்துச் செய்தியில், “ஆயுத பூஜை மற்றும் சரஸ்வதி பூஜை கொண்டாடும் புதுச்சேரி மக்கள் உள்ளிட்ட அனைவருக்கும் புதுச்சேரி மாநில அதிமுக சார்பில் எனது நெஞ்சார்ந்த நல்வாழ்த்துகளைத் தெரிவித்துக் கொள்வதில் பெருமகிழ்ச்சி அடைகிறேன். இவ்விரு புனிதம் நிறைந்த நாட்களின் முக்கிய நோக்கமே நாம் கற்றுணர்ந்த கல்விக்கும், நமது வாழ்வாதாரமாக விளங்கும் செய்யும் தொழிலுக்கும் மனதார நன்றி செலுத்துவதே ஆகும்” என்று கூறியுள்ளார்.
மேலும் மனித வாழ்க்கையின் முன்னேற்றம் குறித்துப் பேசிய அவர், “ஒரு மனிதனின் வாழ்வில் உழைப்பும் கல்வி அறிவும் மிகவும் அவசியமான இரு கூறுகளாகும். உழைப்பு இல்லாமல் வாழ நினைக்கும் மனிதனும், கல்வி அறிவு இல்லாத மனிதனும் சமுதாயத்தில் சிறப்பாக வாழ்ந்ததாக சரித்திரம் இல்லை. நமது அன்றாட வாழ்வில் உழைப்பிற்குத் தேவையான கருவிகள், இயந்திரங்கள் மற்றும் அனைத்துத் தளவாடப் பொருட்களுக்கும் உரிய மதிப்பளித்து, உழைப்பின் பெருமையைப் போற்றி வணங்கும் நன்னாளாக ஆயுத பூஜை திகழ்கிறது” என்று சுட்டிக்காட்டியுள்ளார்.
தொழிலாளர்களின் உரிமைகள் குறித்து வலியுறுத்திய அவர், “உடல் உழைப்பால் சமுதாயத்தை இயக்கும் தொழிலாளர்களின் உழைப்புக்கு உரிய மதிப்பளித்து, அவர்களின் வாழ்க்கைத் தரம் உயர வழிவகை செய்ய வேண்டியது ஒவ்வொரு மக்கள் நல அரசின் தலையாய கடமையாகும். ‘செய்யும் தொழிலே தெய்வம்’ என்ற சான்றோர்களின் அறிவுரைக்கு ஏற்ப நாம் அனைவரும் இந்த விழாக்களில் முழுமையாகப் பங்கெடுத்துக் கொண்டாடுவோம்” எனத் தனது வாழ்த்துச் செய்தியில் அன்பழகன் தெரிவித்துள்ளார்.
