ஆவடி காவலர் குடியிருப்பில் புதிய மழலையர் காப்பகம்: ‘காவல் குடும்பம்’ திட்டத்தின் கீழ் டாக்டர் வனிதா அகர்வால் திறந்து வைத்தார்!
ஆவடி: சென்னை ஆவடி எஸ்.எம். நகர் காவலர் குடியிருப்பில் ‘காவல் குடும்பம்’ திட்டத்தின் கீழ் புதிதாக அமைக்கப்பட்டுள்ள மழலையர் காப்பகத்தை டாக்டர் வனிதா அகர்வால் முறைப்படி திறந்து வைத்தார்.
காவல்துறையினரின் குடும்ப நலன் மற்றும் பணிபுரியும் காவல் துறையினரின் குழந்தைகளின் பாதுகாப்பான பராமரிப்பை உறுதி செய்யும் நோக்கில் பல்வேறு நலத்திட்டங்கள் முன்னெடுக்கப்பட்டு வருகின்றன. அந்த வகையில், தமிழ்நாடு காவல்துறை தலைமை இயக்குநர் மற்றும் படைத்தலைவர் டாக்டர் மகேஷ் குமார் அகர்வால் ஐ.பி.எஸ். அவர்களின் சீரிய ஆலோசனையின்படி ‘காவல் குடும்பம்’ என்ற சிறப்புத் திட்டம் உருவாக்கப்பட்டது.
இத்திட்டத்தின் ஒரு முக்கிய பகுதியாக, ஆவடி எஸ்.எம். நகரில் உள்ள காவலர் குடியிருப்பில் குழந்தைகளுக்கான பிரத்யேக மழலையர் காப்பகம் (Creche) அமைக்கப்பட்டுள்ளது. இதன் திறப்பு விழா இன்று (17.10.2026) நடைபெற்றது. இந்நிகழ்வில் டாக்டர் வனிதா அகர்வால் சிறப்பு விருந்தினராகப் பங்கேற்று, புதிய மழலையர் காப்பகத்தை ரிப்பன் வெட்டித் திறந்து வைத்தார்.
பொதுமக்களின் பாதுகாப்புப் பணிகளில் இரவு பகலாக அயராது ஈடுபடும் காவலர்கள், தங்களது பச்சிளம் குழந்தைகள் மற்றும் மழலையர்களின் பாதுகாப்பு குறித்து அச்சமின்றி மன அமைதியுடன் பணிபுரிய இந்த மழலையர் காப்பகம் பேருதவியாக இருக்கும். நவீன விளையாட்டுப் பொருட்கள், தூய்மையான சூழல் மற்றும் குழந்தைகளுக்கான பாதுகாப்பு வசதிகளுடன் இந்தக் காப்பகம் தயார் செய்யப்பட்டுள்ளது.
காவலர்களின் குடும்ப நலனை மேம்படுத்தும் வகையில் காவல் குடும்பம் திட்டத்தின் கீழ் ஏற்படுத்தப்பட்டுள்ள இந்த மழலையர் காப்பக வசதிக்கு காவலர்கள் மற்றும் அவர்களது குடும்பத்தினர் நெகிழ்ச்சியுடன் வரவேற்பும் பாராட்டும் தெரிவித்துள்ளனர்.
