டீக்கடையில் அமர்ந்து பொதுமக்களின் குறைகளை கேட்டறிந்த உள்துறை அமைச்சர் நமச்சிவாயம்: அதிகாரிகளுக்கு உடனுக்குடன் உத்தரவு!
புதுச்சேரி:
புதுச்சேரி உள்துறை அமைச்சர் ஏ. நமச்சிவாயம், தனது சொந்த தொகுதியான மண்ணாடிப்பட்டு சட்டமன்ற தொகுதிக்குட்பட்ட காட்டேரிக்குப்பம் கிராமத்தில் திடீர் ஆய்வு மேற்கொண்டு, சாலையோர டீக்கடையில் அமர்ந்து பொதுமக்களின் குறைகளை நேரடியாகக் கேட்டறிந்தார்.
மண்ணாடிப்பட்டு தொகுதியில் பல்வேறு வளர்ச்சித் திட்டப் பணிகளைப் பார்வையிட வந்த அமைச்சர் நமச்சிவாயம், காட்டேரிக்குப்பம் கிராமத்தில் உள்ள ஒரு சாலையோர டீக்கடைக்கு திடீரென வருகை தந்தார். அங்கு பொதுமக்களுடன் இயல்பாக அமர்ந்து டீ அருந்தியவாறு, கிராம மக்கள் மற்றும் அப்பகுதி விவசாயிகள் அன்றாடம் சந்திக்கும் அடிப்படைப் பிரச்சினைகள், குடிநீர் விநியோகம், சாலை வசதி மற்றும் மின்சாரக் கட்டமைப்பு உள்ளிட்ட பல்வேறு கோரிக்கைகளைக் கேட்டறிந்தார்.
பொதுமக்கள் அளித்த புகார்கள் மற்றும் கோரிக்கைகளைத் தொடர்ந்து, சம்பந்தப்பட்ட துறை சார்ந்த உயர் அதிகாரிகளை அமைச்சர் நமச்சிவாயம் தனது அலைபேசி வாயிலாக உடனடியாகத் தொடர்புகொண்டு பேசினார். பொதுமக்களின் கோரிக்கைகளை விரைந்து பரிசீலித்து, உரிய கள ஆய்வு மேற்கொண்டு உடனடியாகத் தீர்வு காண வேண்டும் என அதிகாரிகளுக்கு அவர் திட்டவட்டமாக உத்தரவிட்டார்.
இந்த திடீர் கள ஆய்வின்போது, முக்கிய பிரமுகர் ஏ.வி. வீரராகவன் உள்ளிட்ட உள்ளூர் முக்கியப் பிரமுகர்கள் மற்றும் பொதுமக்கள் உடனிருந்தனர். அமைச்சரின் இந்த எளிமையான அணுகுமுறையும், குறைகளுக்கு உடனடியாகத் தீர்வு காண அதிகாரிகளுக்கு உத்தரவிட்டதும் அப்பகுதி மக்களிடையே பெரும் வரவேற்பைப் பெற்றுள்ளது.
📸 புகைப்படத் தொகுப்பு (Photo Gallery)
