நாகர்கோவில் மாநகரை பசுமையாக்க அதிரடி திட்டம்: சுங்கான்கடையில் மரக்கன்றுகள் நடும் பணியை தொடங்கி வைத்தார் ஆணையர் ஐஸ்வர்யா IAS!
நாகர்கோவில்:
நாகர்கோவில் மாநகராட்சிப் பகுதிகளில் சுற்றுச்சூழல் பாதுகாப்பை உறுதி செய்யவும், பசுமை பரப்பை கணிசமாக அதிகரிக்கவும் ‘நகர பசுமையாக்கும் திட்டம்’ (Urban Greening Project) முழுவீச்சில் செயல்படுத்தப்பட்டு வருகிறது. இத்திட்டத்தின் ஒரு பகுதியாக, மாநகரின் முக்கிய நுழைவு வாயிலான சுங்கான்கடை பகுதியில் சாலையோரங்களில் மரக்கன்றுகள் நடும் பணி சிறப்புடன் நடைபெற்றது.
நாகர்கோவில் மாநகராட்சிக்குட்பட்ட பூங்காக்கள், பிரதான சாலையோரங்கள் மற்றும் அரசு பள்ளி வளாகங்களில் பல்வேறு வகையான நிழல்தரும் மற்றும் அலங்கார மரக்கன்றுகளை நட்டு, அவற்றை முறையாகப் பராமரிக்கும் பணிகள் மாநகராட்சி நிர்வாகத்தால் தொடர்ந்து மேற்கொள்ளப்பட்டு வருகின்றன.
இதன் தொடர்ச்சியாக நடைபெற்ற இந்நிகழ்ச்சியில், நாகர்கோவில் மாநகராட்சி ஆணையர் ஐஸ்வர்யா IAS நேரில் கலந்துகொண்டு, சாலையோரங்களில் கண்கவர் ‘பிங்க் டிரம்பெட்’ (Pink Trumpet) மரக்கன்றுகளை நட்டு வைத்து பசுமையாக்கும் பணிகளை முறைப்படி தொடங்கி வைத்தார். பின்னர் அவர் அங்கு நட்ட மரக்கன்றுகளுக்கு நீர் ஊற்றி, அவற்றின் பராமரிப்பு முறைகள் குறித்து அதிகாரிகளுடன் ஆலோசித்தார்.
நாகர்கோவில் மாநகரப் பகுதியை முழுமையான பசுமை நிறைந்த, தூய்மையான மற்றும் சுற்றுச்சூழலுக்கு உகந்த ஒரு முன்மாதிரி மாநகரமாக மாற்றும் உயரிய நோக்கோடு இந்நடவடிக்கைகள் தீவிரப்படுத்தப்பட்டுள்ளன. நடப்படும் மரக்கன்றுகள் ஆடு, மாடுகள் போன்றவற்றால் சேதமடையாத வண்ணம் பாதுகாப்புக் கூண்டுகள் அமைத்து, தினசரி தண்ணீர் ஊற்றி தொடர்ந்து கண்காணிக்கவும் அதிகாரிகளுக்கு உரிய உத்தரவுகள் பிறப்பிக்கப்பட்டுள்ளன.
நகரப் பகுதிகளில் காற்று மாசைக் குறைத்து வெப்பத்தின் தாக்கத்தைத் தணிக்க இத்தகைய மரக்கன்றுகள் நடும் பணிகள் பெரும் துணைபுரியும் என மாநகராட்சி நிர்வாகம் தெரிவித்துள்ளது. தொடர்ந்து மாநகரின் இதர பிரதான சாலைகளிலும், குடியிருப்புப் பகுதிகளிலும் இத்திட்டம் விரிவுபடுத்தப்பட உள்ளதாகவும் அதிகாரிகள் தகவல் தெரிவித்துள்ளனர்.
