வைத்தீஸ்வரன் கோயிலில் புரட்டாசி மாத கிருத்திகை வழிபாடு: அருள்மிகு ஸ்ரீ முத்துக்குமார சுவாமிக்கு சிறப்பு அபிஷேகம், தீபாராதனை!
வைத்தீஸ்வரன் கோயில்: மயிலாடுதுறை மாவட்டம், திருப்புள்ளிருக்குவேலூர் என்று போற்றப்படும் புகழ்பெற்ற வைத்தீஸ்வரன் கோயில் அன்னை தையல்நாயகி உடனமர் அருள்மிகு வைத்தியநாதசுவாமி திருக்கோயிலில் புரட்டாசி மாத கிருத்திகையை முன்னிட்டு அருள்மிகு ஸ்ரீ முத்துக்குமார சுவாமிக்கு சிறப்பு அபிஷேகம், அலங்காரம் மற்றும் மகா தீபாராதனை வெகு விமரிசையாக நடைபெற்றது.
நவக்கிரகங்களில் செவ்வாய் தலமாகவும், தீராத நோய்களைத் தீர்க்கும் மருந்தீஸ்வரராகவும் விளங்கும் இத்திருக்கோயிலில் தனி சன்னதி கொண்டு அருள்பாலிக்கும் ஸ்ரீ முத்துக்குமார சுவாமிக்கு புரட்டாசி மாத கிருத்திகை நட்சத்திரத்தை முன்னிட்டு அதிகாலை முதலே சிறப்பு வழிபாடுகள் தொடங்கின. முத்துக்குமார சுவாமிக்கு பால், தயிர், சந்தனம், பன்னீர், இளநீர், பஞ்சாமிர்தம் உள்ளிட்ட பல்வேறு நறுமண திரவியங்களால் சிறப்பு அபிஷேகம் மற்றும் ஆராதனைகள் முறைப்படி நடைபெற்றன.
அபிஷேகத்தைத் தொடர்ந்து சுவாமிக்கு மலர் மாலைகள் மற்றும் பட்டு வஸ்திரங்கள் சார்த்தப்பட்டு ராஜ அலங்காரம் செய்யப்பட்டது. தொடர்ந்து மங்கள வாத்தியங்கள் முழங்க, வேத மந்திரங்கள் ஓத அர்ச்சகர்கள் மகா தீபாராதனை காண்பித்தனர். இதில் கலந்துகொண்ட பக்தர்கள் முருகனின் நாமங்களை உச்சரித்து பக்தி பரவசத்துடன் சுவாமி தரிசனம் செய்தனர்.
புரட்டாசி கிருத்திகை தினமான இந்நாளில் முத்துக்குமார சுவாமியை தரிசனம் செய்தால் செவ்வாய் தோஷங்கள் நிவர்த்தியாகும், குடும்பத்தில் அமைதியும் சுபிட்சமும் நிலவும் என்பது ஐதீகமாகும். இதனால் உள்ளூர் பக்தர்கள் மட்டுமின்றி சுற்றுவட்டார பகுதிகள் மற்றும் வெளி மாவட்டங்களில் இருந்தும் திரளான பக்தர்கள் திருக்கோயிலுக்கு வருகை தந்து நெய் தீபமேற்றி நேர்த்திக்கடன் செலுத்தி சுவாமியை வழிபட்டனர்.
