தட்டாஞ்சாவடியில் எடுபடாததால் விஜய் படத்தை வைத்து காங்கிரஸ் வாக்கு கேட்கிறது: பாஜக தலைவர் ராமலிங்கம் விமர்சனம்!
புதுச்சேரி: தட்டாஞ்சாவடி தொகுதியில் காங்கிரஸ் கட்சியின் பிம்பம் எடுபடாததால் தான், அவர்கள் விஜய் படத்தை வைத்து மக்களிடம் வாக்கு சேகரித்து வருகின்றனர் என்று புதுச்சேரி மாநில பாஜக தலைவர் ராமலிங்கம் விமர்சித்துள்ளார்.
புதுச்சேரியில் செய்தியாளர்களிடம் பேசிய அவர், புதுச்சேரி மக்கள் காங்கிரஸ் கட்சியை முற்றிலுமாகப் புறந்தள்ளிவிட்டதாகத் தெரிவித்தார். கடந்த முறை நடைபெற்ற தேர்தலில் காங்கிரஸ் கட்சிக்கு இரண்டு இடங்கள் மட்டுமே கிடைத்த நிலையில், தற்போது ஒரே ஒரு இடம் மட்டுமே கிடைத்துள்ளதை அவர் சுட்டிக்காட்டினார். இதனால் காங்கிரஸ் தனது அரசியல் செல்வாக்கை முழுமையாக இழந்துவிட்டதாக அவர் குறிப்பிட்டார்.
மேலும், புதுச்சேரியில் அடுத்த முறை காங்கிரஸ் என்ற கட்சியே இருக்காது என முதலமைச்சர் என்.ரங்கசாமி மிகத் தெளிவாகக் கூறியுள்ளதை நினைவுகூர்ந்த ராமலிங்கம், மக்களின் ஆதரவை இழந்ததால்தான் பிற தலைவர்கள் மற்றும் நடிகர்களின் படங்களை காங்கிரஸ் கட்சியினர் தங்களின் தேர்தல் அரசியலுக்குப் பயன்படுத்தி வருவதாகக் குற்றம்சாட்டினார்.
