17 ஆண்டுகளுக்குப் பிறகு மதுரை மீனாட்சி அம்மன் கோவில் மகா கும்பாபிஷேகம் விமரிசையாக நடைபெற்றது!
மதுரை: உலகப் புகழ்பெற்ற மதுரை அருள்மிகு மீனாட்சி சுந்தரேஸ்வரர் திருக்கோவில் மகா கும்பாபிஷேகப் பெருவிழா, பல்லாயிரக்கணக்கான பக்தர்கள் புடைசூழ இன்று காலை கோலாகலமாக நடைபெற்றது. வேத மந்திரங்கள் மற்றும் மங்கல வாத்தியங்கள் முழங்க, 17 ஆண்டுகளுக்குப் பிறகு நடைபெற்ற இந்தத் திருக்குட நன்னீராட்டுப் பெருவிழாவைக் காண தமிழகத்தின் பல்வேறு பகுதிகளில் இருந்தும் திரளான பக்தர்கள் மதுரையில் குவிந்தனர்.
முன்னதாக, கடந்த செப்டம்பர் 11-ஆம் தேதி தொடங்கிய யாகசாலை பூஜைகள் நிறைவடைந்ததைத் தொடர்ந்து, காலை 7.45 மணி முதல் 8.10 மணிக்குள் விமான கலசங்களுக்குப் புனித நீர் ஊற்றப்பட்டது. மீனாட்சி அம்மன் மற்றும் சுந்தரேஸ்வரர் சுவாமி சன்னதிகளின் தங்க விமான கலசங்களுக்கு சிவாச்சாரியார்கள் வேத மந்திரங்கள் முழங்க புனித நீரை ஊற்றி மகா கும்பாபிஷேகத்தை நிறைவேற்றினர். தொடர்ந்து மகா தீபாராதனை காட்டப்பட்டு, கூடியிருந்த பக்தர்கள் மீது புனித நீர் தெளிக்கப்பட்டது.
இப்பெருவிழாவை முன்னிட்டு, இந்து சமய அறநிலையத்துறை சார்பில் ரூ.32.29 கோடி மதிப்பீட்டில் 186 திருப்பணிகள் மேற்கொள்ளப்பட்டன. தொல்லியல் துறை வல்லுநர்களின் வழிகாட்டுதலின்படி, கோவிலின் 14 பிரம்மாண்ட கோபுரங்களும் பழமை மாறாமல் புனரமைக்கப்பட்டு வர்ணம் பூசப்பட்டன. நேற்று இரவு முதலே கோவில் வளாகத்தைச் சுற்றித் திரண்ட பக்தர்கள் ‘தாயே மீனாட்சி’, ‘தென்னாடுடைய சிவனே போற்றி’ என பக்தி முழக்கமிட்டு சாமி தரிசனம் செய்தனர்.
