விநாயகர் சிலை ஊர்வலப் பாதைகளில் மதுக்கடைகளை மூட உத்தரவு: புதுச்சேரி ஆட்சியர் குலோத்துங்கன் அதிரடி

புதுச்சேரி: புதுச்சேரியில் வரவிருக்கும் விநாயகர் சதுர்த்தி விழாவையொட்டி, விநாயகர் சிலைகள் ஊர்வலமாக எடுத்துச் செல்லப்படும் முக்கியப் பாதைகளில் உள்ள அனைத்து மதுபானக் கடைகளையும் மூட மாவட்ட ஆட்சியர் அ. குலோத்துங்கன் உத்தரவிட்டுள்ளார்.

நடப்பாண்டு விநாயகர் சதுர்த்தி விழா செப்டம்பர் 14-ஆம் தேதியும், சிலைகளைக் கடலில் கரைக்கும் பிரம்மாண்ட ஊர்வலம் செப்டம்பர் 20-ஆம் தேதியும் நடைபெற உள்ளது. இதனையொட்டி விழாவுக்கான விரிவான பாதுகாப்பு, பொது சுகாதாரம் மற்றும் சுற்றுச்சூழல் முன்னெச்சரிக்கை நடவடிக்கைகள் குறித்த ஆலோசனைக் கூட்டம் மாவட்ட ஆட்சியர் அலுவலகத்தில் ஆட்சியர் அ. குலோத்துங்கன் தலைமையில் நடைபெற்றது.

இந்த ஆலோசனைக் கூட்டத்தில், சிலை கரைப்பு ஊர்வலங்களின் போது சட்டம்-ஒழுங்கைப் பராமரிக்கவும், அசம்பாவிதங்கள் எதுவும் நிகழாமல் தடுக்கவும் ஊர்வலம் செல்லும் வழிகளில் உள்ள மதுக்கடைகளை முழுமையாக மூட உத்தரவிடப்பட்டது. மேலும், காவல்துறை, தீயணைப்புத் துறை மற்றும் உள்ளாட்சி அமைப்புகள் இணைந்து பாதுகாப்புப் பணிகளையும், கடற்கரையில் தேவையான முன்னெச்சரிக்கை நடவடிக்கைகளையும் துரிதமாக மேற்கொள்ள அறிவுறுத்தப்பட்டுள்ளது.