மக்கள் தலைவர் ப. கண்ணன் பிறந்த நாள் மற்றும் நினைவு நாளை அரசு விழாவாக அறிவிக்க கோரிக்கை

புதுச்சேரி: புதுச்சேரி அரசியலில் தனி முத்திரை பதித்த முன்னாள் அமைச்சர் மற்றும் சபாநாயகர் திரு. ப. கண்ணன் அவர்களின் பிறந்த நாள் மற்றும் நினைவு நாளை அரசு விழாவாக அனுசரிக்க வேண்டும் என கோரிக்கை எழுந்துள்ளது. இது தொடர்பாக எஸ். ரத்தினம் @ மனோகர் என்பவர் புதுச்சேரி துணைநிலை ஆளுநர் மற்றும் முதலமைச்சருக்கு விடுத்துள்ள கோரிக்கை மனுவில் இந்த வேண்டுகோளை முன்வைத்துள்ளார். புதுச்சேரி மக்களின் நலனுக்காகவும், நேர்மையான நிர்வாகத்திற்காகவும் பாடுபட்ட ப. கண்ணன் அவர்களின் சேவையை அங்கீகரிக்கும் வகையில் இந்த நடவடிக்கை அமைய வேண்டும் என்று அவர் வலியுறுத்தியுள்ளார்.

1985-ஆம் ஆண்டு அமைச்சராகவும், பின்னர் சபாநாயகராகவும், நாடாளுமன்ற உறுப்பினராகவும் பணியாற்றிய ப. கண்ணன், மாணவர்களுக்கு இலவச சைக்கிள் வழங்கும் திட்டம், முதியோர் ஓய்வூதியம், அங்கன்வாடி மையங்கள் மற்றும் சுகாதாரக் கட்டமைப்பு மேம்பாடு எனப் பல மக்கள் நலத் திட்டங்களைச் செயல்படுத்திய முன்னோடியாகத் திகழ்ந்தார். மக்களுடன் நேரடியாகக் களத்தில் நின்று பணியாற்றியதாலேயே அவர் ‘மக்கள் தலைவர்’ என்று அன்புடன் அழைக்கப்பட்டார்.

புதுச்சேரியின் வரலாற்றில் முக்கியப் பங்காற்றிய இத்தகைய தலைவரின் பிறந்த நாள் மற்றும் நினைவு நாளை அரசு அதிகாரப்பூர்வமாக அனுசரிப்பது, அவரது பொதுச்சேவையின் மதிப்பை அடுத்த தலைமுறைக்குக் கொண்டு செல்லும் என அம்மனுவில் சுட்டிக்காட்டப்பட்டுள்ளது. ஆளுநரும் முதலமைச்சரும் இந்தக் கோரிக்கையைக் கனிவுடன் பரிசீலித்து உரிய நடவடிக்கை எடுக்க வேண்டும் என்பதே சமூக ஆர்வலர்களின் எதிர்பார்ப்பாக உள்ளது.