சர்வதேச கடற்கரை தூய்மை தினம்: புதுச்சேரி, தமிழகம் உள்ளிட்ட 5 மாநிலங்களில் எம்.எஸ்.சுவாமிநாதன் ஆராய்ச்சி நிறுவனம் தீவிர தூய்மைப் பணி!
புதுச்சேரி: சர்வதேச கடற்கரை தூய்மை தினத்தை முன்னிட்டு, எம்.எஸ்.சுவாமிநாதன் ஆராய்ச்சி நிறுவனம் (MSSRF) சார்பில் ‘தூய்மையான கடல், பாதுகாப்பான கடல் 5.0’ (Swachh Sagar, Surakshit Sagar 5.0) திட்டத்தின் கீழ் பிரம்மாண்ட தூய்மைப் பணிகள் ஒருங்கிணைக்கப்பட்டன. புதுச்சேரி, தமிழ்நாடு, ஆந்திரப் பிரதேசம், கேரளா மற்றும் கர்நாடகா ஆகிய ஐந்து கடலோர மாநிலங்கள் மற்றும் யூனியன் பிரதேசங்களில் மொத்தம் 55 இடங்களில் இந்த கடற்கரை தூய்மைப் பணிகள் வெற்றிகரமாக நடைபெற்றன.
மத்திய புவி அறிவியல் அமைச்சகம் (MoES), இந்திய தேசிய பெருங்கடல் தகவல் சேவைகள் மையம் (INCOIS) மற்றும் எச்.சி.எல். அறக்கட்டளை (HCL Foundation) ஆகியவற்றின் ஆதரவுடன் இந்த விழிப்புணர்வு மற்றும் தூய்மை இயக்கம் முன்னெடுக்கப்பட்டது. இதில் கடலோரப் பகுதி பொதுமக்கள், மீனவ சமுதாயத்தினர் மற்றும் தன்னார்வலர்கள் பெருமளவில் பங்கேற்று கடற்கரைகளில் குவிந்திருந்த பிளாஸ்டிக் மற்றும் திடக்கழிவுகளை அகற்றினர்.
இந்தியாவின் கடற்கரைகள் மற்றும் கடல்சார் சுற்றுச்சூழல் அமைப்பைப் பாதுகாக்கும் நோக்கில் இந்த நடவடிக்கை முன்னெடுக்கப்பட்டது. கடல் வளங்களைப் பாதுகாக்கவும், எதிர்கால சந்ததியினருக்கு தூய்மையான பெருங்கடலை உருவாக்கவும் கடலோர சமுதாய மக்கள் ஒன்றிணைந்து செயலாற்ற வேண்டும் என்று இந்த இயக்கத்தின் மூலம் வலியுறுத்தப்பட்டது.
