புதுச்சேரியில் மின்தடை சீரமைப்பு மற்றும் போக்குவரத்து நெரிசல் கட்டுப்பாடு: அமைச்சர் நமச்சிவாயம் உறுதி!

புதுச்சேரி, ஆக. 31: புதுச்சேரி மாநிலம் முழுவதும் ஏற்படும் மின்தடை பிரச்னைகளைச் சரிசெய்யவும், போக்குவரத்து நெரிசலைக் கட்டுப்படுத்தவும் அரசு தீவிர நடவடிக்கைகளை மேற்கொண்டு வருவதாக உள்துறை மற்றும் மின்துறை அமைச்சர் ஏ.நமச்சிவாயம் தெரிவித்துள்ளார். சட்டப்பேரவையில் உறுப்பினர்களின் கேள்விகளுக்குப் பதிலளித்துப் பேசிய அவர், பொதுமக்கள் நலன் கருதி அனைத்துப் பகுதிகளிலும் தடையில்லா மின்சாரம் வழங்கத் தேவையான அனைத்து முன்னெச்சரிக்கை நடவடிக்கைகளும் முழுவீச்சில் எடுக்கப்பட்டு வருவதாகக் குறிப்பிட்டார்.

மேலும் புதுச்சேரியின் போக்குவரத்து நெரிசல் குறித்துப் பேசிய அமைச்சர், “மாநிலத்தில் மக்கள் தொகையும் வாகனங்களின் எண்ணிக்கையும் பல மடங்கு அதிகரித்துள்ளது. ஆனால், கடந்த 40 ஆண்டுகளுக்கு மேலாக சாலை விரிவாக்கப் பணிகள் போதிய அளவில் மேற்கொள்ளப்படவில்லை. இதுவே போக்குவரத்து நெரிசலுக்கு முக்கியக் காரணமாக அமைகிறது. இருப்பினும், பொதுமக்களுக்கு இடையூறு ஏற்படாத வகையில் போக்குவரத்து காவல்துறையினர் மூலம் நெரிசலைச் சீர்செய்ய தொடர் நடவடிக்கைகள் எடுக்கப்பட்டு வருகின்றன” என்றார்.

தொடர்ந்து பேசிய அவர், சட்டமன்ற உறுப்பினர்கள் தங்கள் தொகுதி சார்ந்த கோரிக்கைகளை எந்தவித பாரபட்சமுமின்றி அரசு அணுகும் என்றும், முன்வைக்கப்பட்ட அனைத்து நியாயமான கோரிக்கைகளும் படிப்படியாக நிறைவேற்றித் தரப்படும் என்றும் உறுதியளித்தார்.