காரைக்காலில் 10 ஆண்டு கால மின்தடை பிரச்சனைக்கு தீர்வு: ₹50.44 லட்சத்தில் புதிய மின் கட்டமைப்பு பணிகள் தொடக்கம்!
காரைக்கால்: நிரவி – திருப்பட்டினம் தொகுதிக்கு உட்பட்ட பகுதிகளில் கடந்த 10 ஆண்டுகளுக்கும் மேலாக நீடித்து வந்த தொடர் மின்வெட்டு பிரச்சனைக்கு நிரந்தர தீர்வு காணும் வகையில், ₹50.44 லட்சம் மதிப்பீட்டிலான புதிய மின்கட்டமைப்பு பணிகள் மக்கள் பயன்பாட்டிற்கு கொண்டுவரப்பட்டுள்ளன.
நிரவி நாகூர் சாலை, நேதாஜி நகர், சுப்பையாப்பிள்ளை நகர் மற்றும் மதகடி பாலம் உள்ளிட்ட பகுதிகளில் சீரான மின் விநியோகத்தை உறுதி செய்யும் நோக்கில், ₹50.44 லட்சம் மதிப்பீட்டில் புதிதாக 124 மின்கம்பங்கள் நடப்பட்டு கட்டமைப்பு பணிகள் முழுமையாக நிறைவு செய்யப்பட்டன. இதன் தொடக்க நிகழ்ச்சி நிரவி – திருப்பட்டினம் தொகுதி சட்டமன்ற உறுப்பினர் டி.கே.எஸ்.எம். மீனாட்சிசுந்தரம் தலைமையில் நடைபெற்றது.
இந்நிகழ்வில் புதுச்சேரி உள்துறை மற்றும் மின்சாரத்துறை அமைச்சர் ஏ. நமச்சிவாயம், வேளாண்மைத்துறை அமைச்சர் ஜி.என்.எஸ். ராஜேஸ்வரன் மற்றும் நெடுங்காடு – கோட்டுச்சேரி தொகுதி சட்டமன்ற உறுப்பினர் டாக்டர் வி. விக்னேஸ்வரன் ஆகியோர் சிறப்பு விருந்தினர்களாக கலந்துகொண்டு புதிய மின் கட்டமைப்பை முறைப்படி தொடங்கி வைத்தனர். இப்பணிகள் நிறைவடைந்ததன் மூலம் இப்பகுதி மக்களின் நீண்ட நாள் மின் பிரச்சனைக்கு தீர்வு கிடைத்துள்ளது.
