சென்னை, ஆக. 23: சென்னை தண்டையார்பேட்டையில் ஊதிய உயர்வு மற்றும் பணி நிரந்தரம் உள்ளிட்ட கோரிக்கைகளை வலியுறுத்தி போராட்டத்தில் ஈடுபட்ட தூய்மைப் பணியாளர்களை காவல்துறையினர் கைது செய்துள்ளனர். தங்களின் நீண்ட கால கோரிக்கைகளை நிறைவேற்றக்கோரி பணியாளர்கள் திரண்டு போராட்டம் நடத்திய சூழலில், இந்த கைது நடவடிக்கை மேற்கொள்ளப்பட்டது.
கைது செய்யப்பட்ட தூய்மைப் பணியாளர்களை காவல்துறை வாகனங்களில் ஏற்றிய பின், அவர்களை சுமார் இரண்டு மணி நேரத்திற்கும் மேலாக பேருந்திலேயே வைத்து சுற்றி அலைக்கழித்ததாக பணியாளர்கள் குற்றம் சாட்டியுள்ளனர். இது பணியாளர்கள் மத்தியில் பெரும் அதிருப்தியை ஏற்படுத்தியுள்ளது.
தொடர்ந்து, கைதான பணியாளர்களை திருமங்கலத்தில் உள்ள ஒரு தனியார் மண்டபத்தில் காவல்துறையினர் அடைத்து வைத்துள்ளனர். தங்கள் கோரிக்கைகள் குறித்து அதிகாரிகளுடன் பேச்சுவார்த்தை நடத்த வேண்டும் என்று கோரியும், காவல்துறையின் இந்த நடவடிக்கையால் தங்களுக்கு பெரும் மன உளைச்சல் ஏற்பட்டுள்ளதாக பாதிக்கப்பட்ட தூய்மைப் பணியாளர்கள் தரப்பில் தெரிவிக்கப்பட்டுள்ளது.
