புதுச்சேரி காவல்துறைக்கு வழங்கப்பட்ட ஜனாதிபதியின் உயரிய ‘வண்ண விருதை’ மத்திய உள்துறை அமைச்சர் அமித் ஷா வழங்கினார். கோரிமேடு காவல்துறை மைதானத்தில் நடைபெற்ற விழாவில், காவல்துறையின் என்சைன் அதிகாரியிடம் ஜனாதிபதியின் வண்ணக் கொடியை அவர் ஒப்படைத்தார்.
உள்நாட்டுப் பாதுகாப்பை உறுதி செய்வதிலும், சட்டம்-ஒழுங்கைப் பேணுவதிலும் புதுச்சேரி காவல்துறை ஆற்றி வரும் சேவை, துணிச்சல் மற்றும் அர்ப்பணிப்பை அமித் ஷா பாராட்டினார். காவல்துறையின் நீண்டகால சிறப்பான சேவை மற்றும் ஒழுக்கத்திற்கான அங்கீகாரமாக இந்த விருது வழங்கப்பட்டுள்ளது.
ஜனாதிபதியின் வண்ண விருது என்பது காவல்துறை அமைப்புகளுக்கு வழங்கப்படும் மிக உயரிய கவுரவங்களில் ஒன்றாகும். இவ்விருது, புதுச்சேரி காவல்துறையினருக்கு மேலும் பொறுப்புணர்வுடனும் உற்சாகத்துடனும் பணியாற்ற ஊக்கமாக அமையும் என விழாவில் தெரிவிக்கப்பட்டது. அமித் ஷாவின் இந்த புதுச்சேரி வருகையின்போது அரசியல் தலைவர்கள் அவரை நேரில் சந்தித்து வரவேற்றனர்.
அமித் ஷா நேரடி ஒளிபரப்பு:
“ஒழுக்கமான காவல் படைக்குக் கிடைக்கக்கூடிய மிகப்பெரிய அங்கீகாரங்களில் இதுவும் ஒன்று” என அமித் ஷா குறிப்பிட்டார். புதுச்சேரி காவல்துறையில் 5,000க்கும் குறைவான பணியாளர்களே இருந்தாலும், யூனியன் பிரதேசத்தின் பாதுகாப்பு, உள்நாட்டுப் பாதுகாப்பு மற்றும் சட்டம்-ஒழுங்கை உறுதி செய்வதில் அவர்கள் குறிப்பிடத்தக்க பங்காற்றி வருவதாக அவர் பாராட்டினார்.
கோவிட்-19 பெருந்தொற்றுக் காலத்தில், முதியோர், குழந்தைகள், பெண்கள் உள்ளிட்ட பொதுமக்களுக்குச் சேவை செய்ததில் புதுச்சேரி காவல்துறையினர் காட்டிய துணிச்சலையும் அர்ப்பணிப்பையும் அமித் ஷா நினைவுகூர்ந்து பாராட்டினார்.
புதுச்சேரி காவல்துறை இந்தக் கௌரவத்தைப் பெறும் 18வது மாநில அல்லது யூனியன் பிரதேச காவல் படையாகும் என்று தெரிவிக்கப்பட்டுள்ளது.
