புதுச்சேரி லீசே பிரான்சே சர்வதேசப் பள்ளியின் வரலாற்றுச் சிறப்புமிக்க 200-வது ஆண்டு விழா: ஆளுநர் கைலாஷ்நாதன், அமைச்சர் நமச்சிவாயம் பெருமிதப் பங்கேற்பு!
புதுச்சேரி: புதுச்சேரி விக்டர் சிமோனல் வீதியில் அமைந்துள்ள உலகப் புகழ்பெற்ற லீசெ பிரான்சே இன்டர்நேசனல் தெ பாண்டிச்சேரி (Lycée Français International de Pondichéry) கல்வி நிறுவனத்தின் வரலாற்றுச் சிறப்புமிக்க 200-ஆம் ஆண்டு விழா இன்று மிக விமரிசையாக நடைபெற்றது. இருநூறு ஆண்டு கால கல்விப் பாரம்பரியத்தைக் கொண்டாடும் வகையில் ஏற்பாடு செய்யப்பட்டிருந்த இந்த பிரம்மாண்ட விழாவில், புதுச்சேரி யூனியன் பிரதேசத்தின் மாண்புமிகு துணைநிலை ஆளுநர் திரு. கே. கைலாஷ்நாதன் அவர்கள் மற்றும் மாண்புமிகு உள்துறை அமைச்சர் திரு. ஆ. நமச்சிவாயம் அவர்கள் சிறப்பு விருந்தினர்களாகக் கலந்துகொண்டு சிறப்பித்தனர்.
விழாவில் சிறப்புரையாற்றிய உள்துறை அமைச்சர் திரு. ஆ. நமச்சிவாயம் அவர்கள், புதுச்சேரி மண்ணிற்கும் பிரான்ஸ் நாட்டிற்கும் இடையேயான வரலாற்று ரீதியான கலாச்சாரப் பிணைப்பில் லீசே பிரான்சே சர்வதேசப் பள்ளி ஆற்றி வரும் பங்கு அளப்பரியது என்று புகழாரம் சூட்டினார். கடந்த இரண்டு நூற்றாண்டுகளாக உலகத்தரம் வாய்ந்த இருமொழிக் கல்வியை வழங்கி, பல்லாயிரக்கணக்கான மாணவ, மாணவிகளை சர்வதேச அளவில் தலைசிறந்த சாதனையாளர்களாக உருவாக்கிய பெருமை இந்த பாரம்பரியமிக்க கல்வி நிறுவனத்திற்கு உண்டு எனத் தெரிவித்தார்.
தொடர்ந்து நடைபெற்ற நிகழ்வுகளில் துணைநிலை ஆளுநர் திரு. கே. கைலாஷ்நாதன் அவர்களின் முன்னிலையில் பள்ளியின் கல்வி வளர்ச்சி, புதுச்சேரி வரலாற்றில் அதன் முக்கியத்துவம் மற்றும் உலகளாவிய கல்விச் சாதனைகள் நினைவுகூரப்பட்டன. இருநூற்றாண்டு விழாவையொட்டி மாணவர்களின் கண்கவர் கலை நிகழ்ச்சிகள் மற்றும் கல்விச் சார்ந்த சிறப்புக் கண்காட்சிகளும் நடைபெற்றன.
கடந்த 1826-ஆம் ஆண்டு நிறுவப்பட்டு, ஆசியாவிலேயே மிகவும் பழமையான பிரெஞ்சு சர்வதேசப் பள்ளிகளில் ஒன்றாகத் திகழும் லீசே பிரான்சே, புதுச்சேரியின் உன்னத கலாச்சார அடையாளமாக விளங்கி வருகிறது. இந்த 200-வது ஆண்டு விழாவில் பள்ளி நிர்வாகத்தினர், ஆசிரியர்கள், மாணவ, மாணவிகள், பெற்றோர் மற்றும் பிரெஞ்சு தூதரகப் பிரதிநிதிகள் திரளாகக் கலந்துகொண்டு விழாவைச் சிறப்பித்தனர்.
