மேரி உழவர்கரையில் தேசிய ஊட்டச்சத்து மாத விழா: அங்கன்வாடி குழந்தைகளுக்கு எம்.எல்.ஏ டாக்டர் நாராயணசாமி பரிசுகள் வழங்கி விழிப்புணர்வு!
புதுச்சேரி: புதுச்சேரி அரசு மகளிர் மற்றும் குழந்தைகள் மேம்பாட்டுத் துறை சார்பில், தேசிய ஊட்டச்சத்து மாத விழா உழவர்கரை தொகுதிக்குட்பட்ட பல்வேறு அங்கன்வாடி மையங்களில் தொடர்ந்து விமரிசையாக நடைபெற்று வருகிறது. வளரும் குழந்தைகளின் ஆரோக்கியம் மற்றும் தாய்மார்களின் ஊட்டச்சத்து தேவையை உறுதி செய்யும் வகையில் இத்திட்டம் முன்னெடுக்கப்பட்டு வருகிறது.
இதன் ஒரு பகுதியாக, மேரி உழவர்கரை ஈஸ்வரன் கோவில் அருகே அமைந்துள்ள அங்கன்வாடி மையத்தில் தேசிய ஊட்டச்சத்து மாத விழா சிறப்பு விழிப்புணர்வு நிகழ்வாக நடைபெற்றது. இந்நிகழ்ச்சிக்கு உழவர்கரை தொகுதி சட்டமன்ற உறுப்பினர் டாக்டர் K. நாராயணசாமி தலைமை தாங்கி, சிறப்பு விருந்தினராகக் கலந்து கொண்டார்.
நிகழ்ச்சியில் சட்டமன்ற உறுப்பினர் டாக்டர் K. நாராயணசாமி பேசுகையில், “குழந்தைகளின் எதிர்கால வளர்ச்சிக்கும் ஆரோக்கியமான சமூகத்தை உருவாக்குவதற்கும் ஊட்டச்சத்து மிகுந்த சரிவிகித உணவு மிகவும் அவசியமாகும். ஆரம்பக் கல்வியுடன் ஆரோக்கியமான வாழ்வியலை ஊட்டச்சத்து மையங்கள் வழங்கி வருகின்றன. இளம் பருவத்திலேயே ஊட்டச்சத்து குறைபாடுகளைக் கண்டறிந்து நிவர்த்தி செய்வது நமது தலையாய கடமை” என்று வலியுறுத்தினார்.
தொடர்ந்து, அங்கன்வாடி மையக் குழந்தைகளுக்கு கற்றல் மற்றும் ஊக்கமளிக்கும் வகையிலான பரிசுப் பொருட்களை எம்.எல்.ஏ டாக்டர் நாராயணசாமி வழங்கி பாராட்டி வாழ்த்தினார். குழந்தைகளுடன் கலந்துரையாடி மகிழ்ந்த அவர், குழந்தைகளின் ஆரோக்கிய நிலையைத் தொடர்ந்து கண்காணிக்க அங்கன்வாடி பணியாளர்களுக்கு ஆலோசனை வழங்கினார்.
இவ்விழாவில் பகுதி அங்கன்வாடி பணியாளர்கள், தாய்மார்கள், குழந்தைகள் மற்றும் என்.ஆர். காங்கிரஸ் கட்சியின் தொகுதி நிர்வாகிகள், தொண்டர்கள் உள்ளிட்ட பொதுமக்கள் பலர் திரளாகக் கலந்து கொண்டு விழாவினைச் சிறப்பித்தனர்.
