ஆரோவில்லில் சுற்றுச்சூழல் பாதுகாப்பு: தன்னார்வலர்கள் முன்னெடுப்பில் வெற்றிகரமாக நடைபெற்ற கழிவு மேலாண்மை முகாம்!
ஆரோவில்:
சர்வதேச நகரமான ஆரோவில்லில் சுற்றுச்சூழல் தூய்மை மற்றும் கழிவு மேலாண்மையை மேம்படுத்தும் நோக்கில், கடந்த செப்டம்பர் 20-ஆம் தேதி ‘ஈகோ சர்வீஸ் கழிவு அவசரக்கால முகாம்’ (Eco Service Waste Emergency Campaign) சிறப்பாக நடைபெற்றது. ஆரோவில் பகுதியில் உள்ள குடியிருப்பாளர்கள் மற்றும் தன்னார்வலர்களின் தீவிர கூட்டு முயற்சியால் இந்த தூய்மைப் பணி முன்னெடுக்கப்பட்டது.
சுற்றுச்சூழலைப் பாதுகாத்து, பசுமையான எதிர்காலத்தை உருவாக்கும் இலக்குடன் நடைபெற்ற இந்த முகாமில், ஆரோவில்லின் பல்வேறு பகுதிகளைச் சேர்ந்த பொதுமக்கள், இளைஞர்கள் மற்றும் அமைப்பின் உறுப்பினர்கள் ஆர்வத்துடன் பங்கேற்றனர். அவர்கள் ஒருங்கிணைந்து டன் கணக்கிலான உலர் மற்றும் மறுசுழற்சி செய்யக்கூடிய கழிவுகளைத் திரட்டி, அவற்றை முறையாகத் தரம் பிரிக்கும் பணிகளை மேற்கொண்டனர்.
பொதுமக்கள் தங்கள் இல்லங்கள் மற்றும் பணி வளாகங்களில் தேங்கியிருந்த கழிவுப் பொருட்களைக் கொண்டு வந்து ஒப்படைத்ததோடு மட்டுமல்லாமல், கழிவுகளைப் பிரித்தெடுக்கும் பணிகளிலும் களமிறங்கி உதவினர். இதன் மூலம் டன் கணக்கிலான கழிவுகள் தரம் பிரிக்கப்பட்டு, மறுசுழற்சி மற்றும் முறையான பாதுகாப்பான மறுபயன்பாட்டுக்கு அனுப்பி வைக்க நடவடிக்கைகள் மேற்கொள்ளப்பட்டன.
இது குறித்து ஆரோவில் ஊடக ஒருங்கிணைப்பு மையம் வெளியிட்டுள்ள அறிக்கையில், “தூய்மையான மற்றும் பசுமையான சூழலை உருவாக்குவதில் குடியிருப்பாளர்கள் மற்றும் தன்னார்வலர்களின் அர்ப்பணிப்பு மிக்க உழைப்பு பாராட்டுக்குரியது. இம்முகாமிற்கு நேரில் வந்து ஒத்துழைப்பு வழங்கியவர்களுக்கும், விழிப்புணர்வு தகவல்களைப் பகிர்ந்தவர்களுக்கும் மனமார்ந்த நன்றிகளைத் தெரிவித்துக் கொள்கிறோம். இதுபோன்ற சமூகக் கூட்டுப் பணிகள் சுற்றுச்சூழல் பாதுகாப்பில் பெரும் மாற்றத்தை ஏற்படுத்தும்” என்று தெரிவிக்கப்பட்டுள்ளது.
