மதுரை ராஜாஜி மருத்துவமனையில் ‘தாய் மாமன் தங்க மோதிரம்’ திட்டம் தொடக்கம்: அரசு மருத்துவமனைகளை நோக்கி மக்களை ஈர்க்க புதிய முயற்சி!
மதுரை: தமிழ்நாடு முதலமைச்சர் அவர்கள் மதுரை ராஜாஜி அரசு பொது மருத்துவமனையில் நடைபெற்ற நிகழ்ச்சியில், அரசு மருத்துவமனைகளில் பிறக்கும் பச்சிளம் குழந்தைகளுக்கான ‘தாய் மாமன் தங்க மோதிரம்’ வழங்கும் திட்டத்தை முறைப்படி தொடங்கி வைத்தார். புதிய அரசு பொறுப்பேற்ற மூன்று மாதங்களுக்குள் இத்திட்டம் வெற்றிகரமாக நடைமுறைக்குக் கொண்டுவரப்பட்டுள்ளது.
அரசு மருத்துவமனைகளில் பல்வேறு மகப்பேறு சேவைகள் முற்றிலும் இலவசமாக வழங்கப்பட்டு வந்த போதிலும், அண்மைக்காலமாக அங்கு நிகழும் பிரசவங்களின் எண்ணிக்கை குறைந்து வருவதை மாற்றியமைக்கும் நோக்கில் இத்திட்டம் தொடங்கப்பட்டுள்ளது. இதன் பின்னணியில் ஓர் ஆழமான பொருளாதாரக் கோட்பாடு உள்ளதாகத் தெரிவிக்கப்பட்டுள்ளது.
தற்போதைய புள்ளிவிவரங்களின்படி, அரசு மருத்துவமனையில் ஒரு குடும்பம் பிரசவத்திற்காகச் சராசரியாகச் செலவிடும் தொகை வெறும் ரூ.1,412 மட்டுமே. ஆனால், தனியார் மருத்துவமனைகளில் இப்பிரசவச் செலவு சராசரியாக ரூ.69,914 ஆக உள்ளது. பொதுமக்கள் தனியார் மருத்துவமனைகளைத் தவிர்த்து அரசு மருத்துவமனைகளைத் தேர்ந்தெடுக்கும் போது, ஒரு பிரசவத்திற்குச் சராசரியாக ரூ.68,500 மிச்சமாகிறது. இதன் மூலம் ஆண்டுக்கு ஒரு லட்சம் குடும்பங்கள் அரசு மருத்துவமனைகளைப் பயன்படுத்தினால் சுமார் ரூ.685 கோடி அளவிற்கு மக்களின் சேமிப்பு உயரும்.
அதே வேளையில், தங்கத்தின் மதிப்பு தொடர்ந்து உயர்ந்து வரும் நிலையில், குழந்தைகளுக்கு வழங்கப்படும் தங்க மோதிரம் அக்குடும்பத்திற்கு ஒரு தொடக்கக்காலப் பொருளாதாரப் பாதுகாப்பாகவும் அமைகிறது. வெறும் தங்க மோதிரத்திற்காக மட்டுமே மக்கள் அரசு மருத்துவமனைக்கு வர வேண்டும் என்பதல்ல; தரமான சிகிச்சை, சுத்தமான பாதுகாக்கப்பட்ட குடிநீர், சுகாதாரமான கழிவறை வசதிகள் போன்ற உயர்தரக் கட்டமைப்பு வசதிகளும் அரசு மருத்துவமனைகளில் முழுமையாக உறுதி செய்யப்படும் எனத் தெரிவிக்கப்பட்டுள்ளது.
இப்புதிய முன்னெடுப்பிற்காக மருத்துவம், மருத்துவக் கல்வி மற்றும் மக்கள் நல்வாழ்வுத்துறையின் சார்பில் முதலமைச்சருக்குத் தனது மனமார்ந்த நன்றிகள் தெரிவிக்கப்பட்டுள்ளன.
