மேகதாது அணை விவகாரம்: புதுச்சேரி சட்டப்பேரவையில் தீர்மானம் கொண்டு வர கார்த்திகேயன் எம்.எல்.ஏ மனு

புதுச்சேரி, ஆக. 22: கர்நாடக அரசு மேகதாதுவில் புதிய அணை கட்டுவதற்கு எதிர்ப்பு தெரிவித்து, புதுச்சேரி சட்டப்பேரவையில் தனிநபர் தீர்மானம் கொண்டு வர அனுமதி கோரி நெல்லித்தோப்பு தொகுதி சட்டமன்ற உறுப்பினர் வே. கார்த்திகேயன், தற்காலிக சபாநாயகரிடம் மனு அளித்துள்ளார்.

இந்த மனுவில் அவர் குறிப்பிட்டுள்ளதாவது, கர்நாடக அரசின் மேகதாது அணைத் திட்டம் நடைமுறைக்கு வந்தால், காவிரி ஆற்றின் கடைமடைப் பகுதியான புதுச்சேரி மாநிலத்தின் காரைக்கால் மாவட்டத்தில் கடுமையான தண்ணீர் தட்டுப்பாடு ஏற்படும். இதனால் அப்பகுதி விவசாயிகள் மற்றும் பொதுமக்கள் வாழ்வாதாரத்தை இழக்கும் அபாயம் உள்ளதாக எச்சரித்துள்ளார்.

எனவே, இந்த விவகாரத்தின் தீவிரத்தைக் கருத்தில் கொண்டு, கர்நாடக அரசின் நடவடிக்கைக்கு எதிர்ப்பு தெரிவித்து புதுச்சேரி சட்டப்பேரவையில் கண்டனத் தீர்மானம் நிறைவேற்ற வேண்டும் என்று கார்த்திகேயன் வலியுறுத்தியுள்ளார். நடப்பு சட்டப்பேரவை கூட்டத்தொடரிலேயே இந்தத் தீர்மானத்தை முன்வைக்க அனுமதி வழங்க வேண்டும் என்று அவர் தனது கோரிக்கையில் கேட்டுக்கொண்டுள்ளார். இப்பிரச்சினை புதுச்சேரியின் நலன் சார்ந்தது என்பதால், அரசு இதற்கு உரிய முக்கியத்துவம் அளித்து நடவடிக்கை எடுக்க வேண்டும் என எதிர்பார்க்கப்படுகிறது.