விழுப்புரம் கண்டாச்சிபுரம் அருகே சென்னகுணம் கிராமத்தில் முருகப்பெருமான் கோயில் கும்பாபிஷேகம் விமரிசையாக நடைபெற்றது!
விழுப்புரம்: விழுப்புரம் மாவட்டம் கண்டாச்சிபுரம் வட்டம், சென்னகுணம் கிராமத்தில் அமைந்துள்ள அருள்மிகு முருகப்பெருமான் திருக்கோயில் மகா கும்பாபிஷேக விழா அப்பகுதி கிராம பொதுமக்கள் மற்றும் பக்தர்களின் பக்திப் பெருக்குடன் வெகு விமரிசையாக நடைபெற்றது.
இத்திருக்கோயில் திருப்பணிகள் அண்மையில் நிறைவுற்றதைத் தொடர்ந்து கும்பாபிஷேக விழாவுக்கான யாகசாலை பூஜைகள் முறைப்படி தொடங்கின. வேத மந்திரங்கள் முழங்க, கணபதி பூஜை, பூர்ணாஹுதி உள்ளிட்ட சிறப்பு வழிபாடுகள் நடைபெற்றன. தொடர்ந்து, யாகசாலையிலிருந்து புனித நீர் அடங்கிய கலசங்கள் மேளதாளங்கள் முழங்க ஊர்வலமாக எடுத்துச் செல்லப்பட்டு, விமான கலசத்திற்கு புனித நீர் ஊற்றி மகா கும்பாபிஷேகம் நடத்தப்பட்டது.
கும்பாபிஷேகத்தை தொடர்ந்து மூலவர் முருகப்பெருமானுக்கு சிறப்பு மகா அபிஷேகம் மற்றும் தீபாராதனைகள் நடைபெற்றன. இந்நிகழ்வில் சென்னகுணம் மற்றும் அதனைச் சுற்றியுள்ள கிராமங்களைச் சேர்ந்த ஏராளமான பக்தர்கள் திரளாக கலந்துகொண்டு சுவாமி தரிசனம் செய்தனர். விழாவில் கலந்துகொண்ட அனைத்து பக்தர்களுக்கும் சிறப்பு அன்னதானமும் பிரசாதமும் வழங்கப்பட்டது.
