புதுச்சேரியில் போதைப்பொருள் விழிப்புணர்வு இருசக்கர வாகன பேரணி: ஆளுநர், முதலமைச்சர் கொடியசைத்து தொடங்கி வைத்தனர்!
புதுச்சேரி:
புதுச்சேரி கடற்கரைச் சாலையில் போதைப்பொருட்களுக்கு எதிரான விழிப்புணர்வை பொதுமக்கள் மற்றும் இளைஞர்களிடையே ஏற்படுத்தும் நோக்கில், புதுச்சேரி காவல்துறை சார்பில் பிரம்மாண்ட மோட்டார் சைக்கிள் பேரணி ஏற்பாடு செய்யப்பட்டது. “போதைப்பொருட்களுக்கு எதிராக தேசத்திற்காகப் பயணிப்போம்” என்ற முழக்கத்துடன் நடைபெற்ற இப்பேரணி, கடற்கரைச் சாலையில் உள்ள மகாத்மா காந்தி சிலை திடலில் இருந்து தொடங்கியது.
இந்நிகழ்ச்சியில் புதுச்சேரி துணைநிலை ஆளுநர் கே. கைலாஷ்நாதன், முதலமைச்சர் ந. ரங்கசாமி, சட்டப்பேரவைத் தலைவர், உள்துறை அமைச்சர் ஆ. நமச்சிவாயம் மற்றும் காவல்துறை தலைமை இயக்குநர் (டிஜிபி) ஷாலினி சிங் ஆகியோர் சிறப்பு விருந்தினர்களாகப் பங்கேற்றனர். அவர்கள் விழிப்புணர்வு பலூன்களை வானில் பறக்கவிட்டும், கொடியசைத்தும் இந்த இருசக்கர வாகனப் பேரணியை முறைப்படி தொடங்கி வைத்தனர்.
இந்தப் பேரணியில் புதுச்சேரி காவல்துறையின் இருசக்கர வாகனப் படை வீரர்கள், பல்வேறு பள்ளி மற்றும் கல்லூரி மாணவர்கள், தன்னார்வலர்கள் மற்றும் பொதுமக்கள் திரளாகக் கலந்துகொண்டனர். போதைப்பொருட்களின் தீமைகள் மற்றும் அதனால் ஏற்படும் குடும்ப, சமூக சீரழிவுகள் குறித்த வாசகங்கள் அடங்கிய விழிப்புணர்வு பதாகைகளை வாகனங்களில் ஏந்தியவாறு அவர்கள் முக்கிய வீதிகள் வழியாகச் சென்றனர்.
புதுச்சேரி யூனியன் பிரதேசத்தில் போதைப்பொருள் புழக்கத்தை முற்றிலுமாக ஒழிக்க அரசு கடுமையான நடவடிக்கைகளை முன்னெடுத்து வருகிறது. இதன் ஒரு பகுதியாக இளைஞர்கள் மற்றும் மாணவர்களை நல்வழிப்படுத்தும் நோக்கில் தொடர் கண்காணிப்பு சோதனைகள், கல்வி நிறுவனங்களில் விழிப்புணர்வு முகாம்கள் ஆகியவை புதுச்சேரி காவல்துறையினரால் தீவிரப்படுத்தப்பட்டு வருவது குறிப்பிடத்தக்கது.
மேலும் இந்நிகழ்வில் சட்டமன்ற உறுப்பினர்கள், அரசுத் தலைமைச் செயலாளர், காவல்துறை உயர் அதிகாரிகள், காவலர்கள் உள்ளிட்ட பல்துறை அலுவலர்கள் மற்றும் சமூக ஆர்வலர்கள் பலர் உடனிருந்து விழிப்புணர்வு உறுதிமொழியேற்றனர்.
