புதுச்சேரியில் 16-வது தேசிய அளவிலான சிலம்பம், கராத்தே சாம்பியன்ஷிப் போட்டி: எம்எல்ஏ எஸ்.எஸ்.அழகு பரிசளிப்பு!
புதுச்சேரி, ஆக. 30: புதுச்சேரி லாஸ்பேட்டையில் அமைந்துள்ள பல்நோக்கு உள்விளையாட்டு அரங்கத்தில், SBKS ஸ்போர்ட்ஸ் அகாடமி மற்றும் இந்திய இளைஞர் விளையாட்டு மேம்பாட்டு சங்கம் சார்பில் 16-வது தேசிய அளவிலான சிலம்பம், கராத்தே, குங்ஃபூ மற்றும் யோகா சாம்பியன்ஷிப் போட்டிகள் மிகச் சிறப்பாக நடைபெற்றன. பல்வேறு பிரிவுகளில் நடைபெற்ற இந்தத் தேசியப் போட்டிகளில் ஏராளமான மாணவ, மாணவிகள் மற்றும் வீரர், வீராங்கனைகள் ஆர்வத்துடன் கலந்துகொண்டு தங்களது தனித்துவமான தற்காப்புக் கலைத் திறமைகளை வெளிப்படுத்தினர்.
இப்போட்டிகளின் நிறைவு விழாவில், கதிர்காமம் தொகுதி சட்டமன்ற உறுப்பினர் எஸ்.எஸ். அழகு என்ற அழகனந்தம் சிறப்பு விருந்தினராகக் கலந்துகொண்டார். பல்வேறு சுற்றுகளாக நடைபெற்ற சிலம்பம், கராத்தே உள்ளிட்ட போட்டிகளில் சிறப்பிடம் பெற்று வெற்றி பெற்ற வீரர், வீராங்கனைகளுக்கு அவர் வெற்றி கோப்பைகள் மற்றும் பாராட்டுச் சான்றிதழ்களை வழங்கி கவுரவித்தார்.
தொடர்ந்து பேசிய சட்டமன்ற உறுப்பினர், பாரம்பரிய தற்காப்புக் கலைகளையும் யோகாவையும் கற்றுக்கொள்வது உடல் வலிமையையும் மன ஒருமைப்பாட்டையும் வளர்க்கும் என்று கூறி, வெற்றி பெற்ற வீரர்களை மனதாரப் பாராட்டினார். இந்நிகழ்ச்சியில் விளையாட்டு அமைப்பின் நிர்வாகிகள், பயிற்சியாளர்கள், நடுவர்கள் மற்றும் பெற்றோர்கள் பெருமளவில் கலந்துகொண்டனர்.
