புதுச்சேரியில் காசநோய் இல்லா கிராமங்களுக்கு பாராட்டு: ‘ஜோஷ்’ இளைஞர் அமைப்பை தொடங்கி வைத்தார் முதல்வர் ரங்கசாமி!
புதுச்சேரி: புதுச்சேரி கதிர்காமத்தில் அமைந்துள்ள இந்திரா காந்தி மருத்துவக் கல்லூரி மற்றும் ஆராய்ச்சி நிறுவன வளாகத்தில், காசநோய் இல்லாத கிராமங்களுக்கு பாராட்டு தெரிவிக்கும் விழா மற்றும் காசநோய் தடுப்பில் இளைஞர்களை ஈடுபடுத்துவதற்கான ‘ஜோஷ்’ (JOSH) அமைப்பின் தொடக்க விழா இன்று மாலை எழுச்சியுடன் நடைபெற்றது.
இந்நிகழ்ச்சியில் புதுச்சேரி மாண்புமிகு முதலமைச்சர் என். ரங்கசாமி சிறப்பு விருந்தினராகக் கலந்துகொண்டு, காசநோய் முற்றிலும் இல்லாத நிலையை எட்டிய கிராமங்களின் பிரதிநிதிகளுக்கு பாராட்டு மற்றும் சான்றிதழ்களை வழங்கி கௌரவித்தார். இந்நிகழ்வில் மாநிலங்களவை உறுப்பினர் எஸ். செல்வ கணபதி, சட்டமன்ற உறுப்பினர் அழகனந்தம், மருத்துவக் கல்லூரி முதல்வர், சுகாதாரத்துறை உயர் அதிகாரிகள், மருத்துவர்கள் மற்றும் செவிலியர்கள் பலர் கலந்துகொண்டனர்.
காசநோய் விழிப்புணர்வை கிராமங்கள் தோறும் தீவிரமாக கொண்டு சேர்க்கும் வகையிலும், இளைஞர்களின் ஆற்றலை பொது சுகாதாரப் பணிகளில் முழுமையாகப் பயன்படுத்தும் நோக்கிலும் தொடங்கப்பட்ட ‘ஜோஷ்’ இளைஞர் அமைப்பை முதல்வர் ரங்கசாமி மற்றும் சிறப்பு விருந்தினர்கள் முறைப்படி தொடங்கி வைத்தனர். மேலும், இந்த விழிப்புணர்வு நிகழ்வின் சிறப்பு மலரை (Souvenir) அவர்கள் வெளியிட்டு, ‘ஜோஷ்’ அமைப்பின் இளைஞர்களுக்கு பிரத்யேக சீருடை பேட்ஜ்கள் மற்றும் அடையாள உடைகளை வழங்கி பாராட்டினர்.
புதுச்சேரி யூனியன் பிரதேசம் முழுவதும் தொற்றுநோய்களைக் கட்டுப்படுத்துவதிலும் பொது சுகாதாரத்தை மேம்படுத்துவதிலும் அரசு தீவிர கவனம் செலுத்தி வருகிறது. அண்மையில் காரைக்கால், கோட்டுச்சேரி உள்ளிட்ட பல்வேறு பிராந்தியங்களில் டெங்கு கொசு ஒழிப்பு மற்றும் தீவிர சுகாதாரப் பணிகள் துரிதப்படுத்தப்பட்டதைத் தொடர்ந்து, தற்போது காசநோயை புதுவையிலிருந்து முழுமையாக அகற்றும் நோக்கில் கிராமப்புற அளவிலான இந்த விழிப்புணர்வு முனைப்பு பெரும் வரவேற்பைப் பெற்றுள்ளது.
