பட்டினப்பாக்கத்தில் தலைமைச் செயலகம் கட்டும் முடிவைக் கைவிடுக: தவெக அரசுக்கு மு.க.ஸ்டாலின் கடும் எச்சரிக்கை!
சென்னை, செப். 21: பட்டினப்பாக்கத்தில் புதிய தலைமைச் செயலகம் அமைக்கும் முடிவை அரசு உடனடியாகக் கைவிட வேண்டும் என்றும், இல்லையேல் மீனவர்களுடன் இணைந்து திமுக மாபெரும் போராட்டத்தை முன்னெடுக்கும் என்றும் திமுக தலைவர் மு.க.ஸ்டாலின் எச்சரிக்கை விடுத்துள்ளார்.
இது தொடர்பாக அவர் வெளியிட்டுள்ள அறிக்கையில், சென்னை பட்டினப்பாக்கம் கடற்கரைப் பகுதியில் புதிய தலைமைச் செயலகம் அமைக்க அரசு திட்டமிட்டு அரசாணை வெளியிட்டுள்ளதற்கு மீனவ மக்கள் மற்றும் பொதுமக்கள் மத்தியில் கடும் எதிர்ப்பு எழுந்துள்ளது. பாரம்பரிய வாழ்விடங்களை இழக்கும் அபாயத்தில் உள்ள மீனவர்களின் வேதனையையும் அழுகுரலையும் அரசு கருத்தில் கொள்ள வேண்டும் என்று வலியுறுத்தியுள்ளார்.
மேலும், மக்களின் உணர்வுகளை மதிக்காமல் அராஜகப் போக்குடனும் ஆணவத்துடனும் இத்திட்டப் பணிகளைத் தொடர முற்பட்டால், வாழ்வாதாரத்தை இழக்கும் மீனவ மக்களோடு கைகோர்த்து திமுக களமிறங்கி தீவிரப் போராட்டங்களை நடத்தும் என அவர் காட்டமாகத் தெரிவித்துள்ளார். உடனடியாக இந்த அரசாணையைத் திரும்பப் பெறுவதாக வெளிப்படையான அறிவிப்பை வெளியிட வேண்டும் எனவும் அவர் வலியுறுத்தியுள்ளார்.
