காமராஜ் நகர் தொகுதி வெங்கட்டா நகர், செல்லன் நகர் மக்கள் குறைகள் கேட்டறிந்தார் ஜோஸ் சார்லஸ் மார்ட்டின்!
புதுச்சேரி:
புதுச்சேரி காமராஜ் நகர் தொகுதிக்குட்பட்ட வெங்கட்டா நகர் மற்றும் செல்லன் நகர் மக்கள் நல்வாழ்வு சங்கம் சார்பில் பொதுமக்களுடனான ஆலோசனைக் கூட்டம் நடைபெற்றது. இக்கூட்டத்தில் லட்சிய ஜனநாயகக் கட்சியின் (LJK) முக்கியப் பிரமுகரான ஜோஸ் சார்லஸ் மார்ட்டின் சிறப்பு அழைப்பாளராகக் கலந்து கொண்டு, பொதுமக்களின் கோரிக்கைகளையும் குறைகளையும் கேட்டறிந்தார்.
கூட்டத்தில் கலந்துகொண்ட அப்பகுதி குடியிருப்புவாசிகள் மற்றும் பொதுமக்கள், தங்களது பகுதியில் நிலவி வரும் அடிப்படைப் பிரச்னைகள், சாலை வசதிகள், வடிகால் சீரமைப்பு மற்றும் குடிநீர் உள்ளிட்ட அத்தியாவசிய தேவைகள் குறித்து விரிவாக எடுத்துரைத்தனர். மக்களின் கோரிக்கைகளைக் கனிவுடன் கேட்டறிந்த ஜோஸ் சார்லஸ் மார்ட்டின், அப்பகுதி மக்களின் அத்தியாவசியப் பிரச்னைகளைத் துரிதமாகக் கண்டறிந்து, உடனடியாகச் சரிசெய்து கொடுக்குமாறு உரிய ஊழியர்களுக்கும் களப் பணியாளர்களுக்கும் நேரடியாக உத்தரவிட்டார்.
மேலும், மக்களின் தேவைகள் உடனுக்குடன் தீர்க்கப்படுவதை உறுதி செய்ய வேண்டும் என்றும், பொதுமக்களின் அன்றாட வாழ்க்கை மேம்படத் தேவையான உட்கட்டமைப்புப் பணிகளுக்கு முன்னுரிமை அளிக்கப்பட வேண்டும் என்றும் அவர் அறிவுறுத்தினார். தொகுதி மக்களின் நலன் கருதி முன்னெடுக்கப்படும் இத்தகைய மக்கள் நலப் பணிகளுக்குத் தேவையான அனைத்து ஒத்துழைப்புகளும் தொடர்ந்து வழங்கப்படும் என்றும் அவர் உறுதியளித்தார்.
இந்நிகழ்வில் எல்.ஜே.கே. கட்சியின் நிர்வாகப் பொதுச்செயலாளர் ராம் குமார், பொதுச்செயலாளர் டாக்டர் துரைசாமி, வார்டு பொறுப்பாளர் சரவணன், வாக்குச்சாவடிப் பொறுப்பாளர்கள் (பூத் தலைவர்கள்), குடியிருப்பு நலச் சங்க நிர்வாகிகள் மற்றும் ஏராளமான பொதுமக்கள் திரளாகக் கலந்துகொண்டனர்.
