புதுப்பேட்டை மாரியம்மன் கோவிலில் சிறப்பு பூஜை: தீவிர வாக்கு சேகரிப்பில் காங்கிரஸ் வேட்பாளர் விநாயகம்!
புதுச்சேரி: புதுச்சேரி புதுப்பேட்டை பகுதியில் அமைந்துள்ள புகழ்பெற்ற ஸ்ரீ மாரியம்மன் திருக்கோவிலில் காங்கிரஸ் வேட்பாளர் விநாயகம் சிறப்பு பூஜை மற்றும் வழிபாடுகள் நடத்திவிட்டு, தனது கூட்டணி கட்சித் தலைவர்களுடன் இணைந்து தீவிர வாக்கு சேகரிப்பில் ஈடுபட்டார்.
தேர்தல் களம் தீவிரமடைந்து வரும் நிலையில், புதுப்பேட்டை மாரியம்மன் கோவிலில் சாமி தரிசனம் செய்து தனது பிரச்சாரத்தைத் தொடங்கிய காங்கிரஸ் வேட்பாளர் விநாயகத்திற்கு, கோவில் நிர்வாகிகள் மற்றும் பொதுமக்கள் சார்பில் உற்சாக வரவேற்பு அளிக்கப்பட்டது. அதனைத் தொடர்ந்து, அப்பகுதி வீதிகள் தோறும் சென்று பொதுமக்களை நேரில் சந்தித்து ஆதரவு கோரினார்.
இந்த தேர்தல் பிரச்சாரத்தில் காங்கிரஸ் கட்சியின் முக்கிய நிர்வாகிகள் மற்றும் கூட்டணிக் கட்சிகளின் முன்னணி தலைவர்கள் பலர் கலந்துகொண்டனர். பொதுமக்கள் மற்றும் வியாபாரிகளை நேரில் சந்தித்துப் பேசிய வேட்பாளர் விநாயகம், தொகுதியின் வளர்ச்சிக்கும் மக்களின் நலனுக்கும் தொடர்ந்து பாடுபடுவதாக உறுதியளித்து வாக்கு சேகரித்தார்.
