தூக்குமேடையிலும் தளராத கம்பீரம்: விடுதலைப் போராளி வீரபாண்டிய கட்டபொம்மன் நினைவு நாளில் முதல்வர் மு.க.ஸ்டாலின் புகழஞ்சலி!
சென்னை: விடுதலைப் போராட்ட வீரர் வீரபாண்டிய கட்டபொம்மனின் நினைவு நாளை முன்னிட்டு, தமிழ்நாடு முதலமைச்சர் மு.க.ஸ்டாலின் அவரது வீரத்தையும் தியாகத்தையும் போற்றி புகழஞ்சலி செலுத்தியுள்ளார்.
இது தொடர்பாக முதலமைச்சர் மு.க.ஸ்டாலின் வெளியிட்டுள்ள செய்திக்குறிப்பில், “தூக்குமேடைக்கு நடந்து செல்லும்போதும் துணிச்சலோடும் கர்வத்தோடும் சென்ற விடுதலைப் போராளி வீரபாண்டிய கட்டபொம்மன் நினைவு நாள் இன்று. மானம்தான் பெரிதென வாழ்ந்து, அந்நியர் ஆட்சிக்கு எதிரான விடுதலைக் கனலை மக்கள் மனதில் ஆழமாக விதைத்த அவரது இணையற்ற வீரத்துக்குத் தலைவணங்குகிறேன்” என்று நெகிழ்ச்சியுடன் குறிப்பிட்டுள்ளார்.
மேலும், திராவிட மாடல் ஆட்சியில் விடுதலைப் போராட்ட தியாகிகளுக்கு அளிக்கப்பட்டு வரும் சிறப்புகள் குறித்து விளக்கிய முதலமைச்சர், “வீரபாண்டிய கட்டபொம்மன் அவர்களுக்கு நமது திராவிட மாடல் அரசில் சென்னை காந்தி மண்டப வளாகத்தில் கம்பீரமான திருவுருவச் சிலை அமைக்கப்பட்டுள்ளது. அதுமட்டுமின்றி, மதுரை மாவட்டத்தில் திருமங்கலம் – கள்ளிக்குடி இரயில் நிலையங்களுக்கு இடையே புதிதாகக் கட்டப்பட்டுள்ள சாலை மேம்பாலத்துக்கும் அவரது பெயரைச் சூட்டி தமிழ்நாடு அரசு பெருமை தேடித்தந்துள்ளது” என்று பெருமிதத்தோடு சுட்டிக்காட்டியுள்ளார்.
நாட்டு விடுதலைக்காகவும், தன்மானத்திற்காகவும் ஆங்கிலேய ஏகாதிபத்தியத்தை எதிர்த்து இன்னுயிர் ஈந்த மாவீரர்களின் தியாகங்களை இளைய தலைமுறையினரிடம் கொண்டு சேர்க்கும் வகையில் தமிழ்நாடு அரசு பல்வேறு வரலாற்றுச் சின்னங்களையும் நினைவிடங்களையும் தொடர்ந்து போற்றி பாதுகாத்து வருகிறது. அந்த வகையில், “தமிழ்நிலத்தின் தன்மானம் காத்த தியாகி வீரபாண்டிய கட்டபொம்மன் வாழ்க!” என்று முதலமைச்சர் தனது அஞ்சலி குறிப்பில் முழங்கியுள்ளார்.
