காவிரி நீர் மேலாண்மை தொடர்பாக முழுமையான ஆய்வு நடத்தி விரிவான திட்ட அறிக்கை (DPR) தயாரிக்குமாறு காரைக்கால் தேசிய தொழில்நுட்ப நிறுவனத்திற்கு (NIT புதுச்சேரி) புதுச்சேரி துணைநிலை ஆளுநர் கே. கைலாஷ்நாதன் உத்தரவிட்டுள்ளார்.
விவசாயிகள் ஆலோசனை
காரைக்காலில் உள்ள NIT புதுச்சேரி வளாகத்தில் துணைநிலை ஆளுநர் கே. கைலாஷ்நாதன் விவசாயிகளைச் சந்தித்து ஆலோசனை நடத்தினார். அப்போது நீர் சேமிப்பு மற்றும் தடுப்பணைகள் அமைப்பது குறித்து விரிவான கலந்துரையாடல் நடைபெற்றது.
இந்தச் சந்திப்பின் போது, காவிரி ஆற்றின் நீர் வழங்கல் மற்றும் நிர்வாக முறைகள் தொடர்பாக விவசாயிகள் தங்கள் அனுபவங்களையும் கருத்துகளையும் பகிர்ந்து கொண்டனர்.
நிலத்தடி நீர் உயர்வு
விவசாயிகளிடமிருந்து பெறப்பட்ட பரிந்துரைகளைக் கருத்தில் கொண்டு, காவிரி நீர் மேலாண்மை தொடர்பாக விரிவான திட்ட அறிக்கையைத் தயாரிக்கும் பணி NIT புதுச்சேரியிடம் ஒப்படைக்கப்பட்டுள்ளது.
நீர் வளங்களை நீடித்த முறையில் பாதுகாப்பது, தடுப்பணைகள் மூலம் நிலத்தடி நீர் மட்டத்தை உயர்த்துவது மற்றும் விவசாய உற்பத்தியை நீண்ட காலத்திற்கு நிலையான முறையில் பெருக்குவது ஆகிய நோக்கங்களுடன் இந்த முயற்சி மேற்கொள்ளப்பட்டுள்ளதாகத் தெரிவிக்கப்பட்டுள்ளது.
