தாம்பரம் காவல் ஆணையர் பிரேம் ஆனந்த் சின்ஹா தலைமையில் ஐடி நிறுவன பிரதிநிதிகளுடன் முக்கிய ஆலோசனைக் கூட்டம்!
தாம்பரம்: தாம்பரம் மாநகர காவல் ஆணையரக எல்லைக்குட்பட்ட பகுதிகளில் இயங்கி வரும் முன்னணி தகவல் தொழில்நுட்ப (IT) நிறுவனங்களின் பிரதிநிதிகளுடன் சிறப்பு ஒருங்கிணைப்புக் கூட்டம் நடைபெற்றது. இக்கூட்டத்திற்கு தாம்பரம் மாநகர காவல் ஆணையர் திரு. பிரேம் ஆனந்த் சின்ஹா, இ.கா.ப., அவர்கள் தலைமை தாங்கி வழிநடத்தினார்.
இந்த ஆலோசனைக் கூட்டத்தில் ஐடி நிறுவனங்களில் பணியாற்றும் பெண் ஊழியர்களின் பாதுகாப்புக்கு முன்னுரிமை அளிப்பது தொடர்பாக விரிவாக ஆலோசிக்கப்பட்டது. குறிப்பாக, இரவு நேரப் பணிகளில் ஈடுபடும் ஊழியர்களின் பாதுகாப்பான பயணம், வாகன கண்காணிப்பு வசதிகள் மற்றும் அவசரகால சூழ்நிலைகளில் காவல் துறையைத் தொடர்புகொண்டு உடனடியாக நடவடிக்கை எடுப்பதற்கான அவசரகால ஒருங்கிணைப்பு நடைமுறைகள் குறித்து விவாதிக்கப்பட்டது.
மேலும், தற்காலத்தில் அதிகரித்து வரும் சைபர் குற்றங்கள் மற்றும் இணையவழி நிதி மோசடிகளைத் தடுப்பது குறித்து தீவிரமாக ஆலோசிக்கப்பட்டது. நிறுவனப் பணியாளர்களுக்கு தொடர் சைபர் விழிப்புணர்வை ஏற்படுத்துதல் மற்றும் சந்தேகத்திற்கிடமான பரிவர்த்தனைகள் குறித்து உடனடியாகப் புகாரளிக்கும் வழிமுறைகள் குறித்தும் விளக்கப்பட்டது.
குற்றத் தடுப்பு மற்றும் பொதுப் பாதுகாப்பை மேம்படுத்தும் நோக்கில், ஐடி நிறுவனங்களின் வளாகங்கள் மற்றும் அவற்றைச் சுற்றியுள்ள முக்கிய சாலைப் பகுதிகளில் உயர்தர சிசிடிவி (CCTV) கண்காணிப்பு கேமராக்களைப் பொருத்துவது குறித்தும், அவற்றை காவல் துறையின் கண்காணிப்பு வலையமைப்போடு ஒருங்கிணைப்பது குறித்தும் அறிவுறுத்தப்பட்டது. இக்கூட்டத்தில் காவல் துறை உயர் அதிகாரிகள் மற்றும் பல்வேறு ஐடி நிறுவனங்களின் முக்கியப் பிரதிநிதிகள் கலந்துகொண்டனர்.
