ரயில்வேயில் 3,477 பட்டதாரி பணியிடங்கள்: என்டிபிசி தேர்வுக்கான முக்கிய அறிவிப்பு வெளியீடு!
புதுச்சேரி, 23/09/2026:
ரயில்வே ஆட்சேர்ப்பு வாரியம் (RRB) பட்டதாரிகளுக்கான பல்வேறு தொழில்நுட்பம் அல்லாத பிரபல பிரிவு (NTPC Graduate) பணிகளுக்கான உத்தேச அறிவிப்பை (CEN No. 06/2026) அதிகாரப்பூர்வமாக வெளியிட்டுள்ளது. நாடு முழுவதும் உள்ள ரயில்வே மண்டலங்களில் 7-வது ஊதியக் குழுவின் கீழ் நிலை-5 மற்றும் நிலை-6 ஆகிய ஊதிய பிரிவுகளில் காலியாக உள்ள 3,477 பணியிடங்களை நிரப்புவதற்கு இந்த அறிவிப்பு வெளியிடப்பட்டுள்ளது.
இப்பணிகளுக்கான ஆன்லைன் விண்ணப்பப் பதிவு வரும் அக்டோபர் 8, 2026 அன்று தொடங்க உத்தேசிக்கப்பட்டுள்ளது. தகுதியும் விருப்பமும் உள்ள பட்டதாரிகள் https://www.rrbapply.gov.in என்ற இணையதளம் மூலமாக நவம்பர் 6, 2026 இரவு 11:59 மணி வரை ஆன்லைனில் விண்ணப்பிக்கலாம் என தெரிவிக்கப்பட்டுள்ளது. வயது வரம்பு மற்றும் கல்வித் தகுதி தொடர்பான முழுமையான விவரங்கள் விரிவான அறிவிக்கையில் வெளியிடப்படும்.
விண்ணப்பதாரர்கள் ஆதார் எண்ணைப் பயன்படுத்தி தங்களது சுயவிவரங்களைச் சரிபார்க்குமாறு அறிவுறுத்தப்பட்டுள்ளனர். 10-ஆம் வகுப்பு மதிப்பெண் சான்றிதழில் உள்ள பெயர் மற்றும் பிறந்த தேதி ஆகியவை ஆதாரில் உள்ள விவரங்களுடன் 100% சரியாகப் பொருந்துவதை உறுதிசெய்து கொள்ள வேண்டும். மேலும், புதிய புகைப்படம் மற்றும் பயோமெட்ரிக் விவரங்களை ஆதாரில் முன்கூட்டியே புதுப்பித்து வைப்பது அவசியமாகும்.
இது ஒரு முன்னோட்ட அறிவிப்பு மட்டுமே என்பதால், விரிவான விதிமுறைகள், தகுதிகள் மற்றும் தேர்வு முறைகள் https://rrb.indianrailways.gov.in என்ற பொது இணையதளத்தில் விரைவில் வெளியிடப்படும். அரசு வேலை வாங்கித் தருவதாகக் கூறும் இடைத்தரகர்கள் மற்றும் போலி நபர்களை நம்பி ஏமாற வேண்டாம் எனவும் ரயில்வே வாரியம் எச்சரித்துள்ளது.
