புதுச்சேரி பட்ஜெட் கூட்டத்தொடர் நிறைவு: முதல்வர் ரங்கசாமியிடம் அமைச்சர் நமச்சிவாயம் மற்றும் எம்.எல்.ஏ.க்கள் வாழ்த்து!
புதுச்சேரி: புதுச்சேரி சட்டப்பேரவையில் பட்ஜெட் கூட்டத்தொடர் நிறைவடைந்ததைத் தொடர்ந்து, மாண்புமிகு முதலமைச்சர் திரு. ந. ரங்கசாமி அவர்களுக்கு உள்துறை அமைச்சர் திரு. ஆ. நமச்சிவாயம், அமைச்சர்கள் மற்றும் சட்டமன்ற உறுப்பினர்கள் நேரில் சந்தித்து வாழ்த்து தெரிவித்தனர்.
சட்டப்பேரவை வளாகத்தில் நடைபெற்ற இந்நிகழ்வின் போது, உள்துறை அமைச்சர் ஆ. நமச்சிவாயம் முதலமைச்சர் ரங்கசாமிக்கு பொன்னாடை அணிவித்து, மலர்க்கொத்து வழங்கி தங்களது வாழ்த்துகளைத் தெரிவித்தார். அவருடன் ஆளும் கூட்டணிக் கட்சியைச் சேர்ந்த அமைச்சர்கள் மற்றும் சட்டமன்ற உறுப்பினர்களும் முதலமைச்சருக்கு பூங்கொத்து கொடுத்து வாழ்த்துப் பகிர்ந்துகொண்டனர்.
புதுச்சேரி மாநிலத்தின் உட்கட்டமைப்பு வளர்ச்சி மற்றும் மக்கள் நலன் சார்ந்த முக்கிய அம்சங்களுடன் தாக்கல் செய்யப்பட்ட இந்த பட்ஜெட் கூட்டத்தொடர் ஆக்கப்பூர்வமாக நிறைவுபெற்ற நிலையில், அரசு அறிவித்துள்ள நலத்திட்டங்களை விரைந்து மக்களிடம் கொண்டு சேர்ப்பது குறித்தும் மக்கள் பிரதிநிதிகள் முதலமைச்சருடன் கலந்துரையாடினர்.
