காரைக்காலில் 300 மாணவ, மாணவிகளுக்கு விலையில்லா மிதிவண்டி மற்றும் மழைக்கோட்: எதிர்க்கட்சித் தலைவர் நாஜிம், அமைச்சர்கள் வழங்கினர்!
காரைக்கால்: காரைக்கால் தெற்கு தொகுதிக்குட்பட்ட அரசு மற்றும் அரசு உதவிபெறும் பள்ளிகளைச் சேர்ந்த 300 மாணவ, மாணவிகளுக்கு விலையில்லா மிதிவண்டிகள் (சைக்கிள்) மற்றும் மழைக்கோட்டுகள் வழங்கும் நிகழ்ச்சி சிறப்பாக நடைபெற்றது.
புதுச்சேரி அரசின் பள்ளிக்கல்வித்துறை மற்றும் நலத்திட்டப் பிரிவின் கீழ் மாணவர்களின் கல்விப் பயணத்தை ஊக்குவிக்கும் நோக்கில் இந்நடவடிக்கை மேற்கொள்ளப்பட்டுள்ளது. காரைக்கால் தெற்கு தொகுதியில் நடைபெற்ற இந்நிகழ்ச்சியில், புதுச்சேரி சட்டமன்ற எதிர்க்கட்சித் தலைவர் ஏ.எம்.எச். நாஜிம் மற்றும் மாண்புமிகு அமைச்சர்கள் நேரில் கலந்துகொண்டு மாணவர்களுக்கு நலத்திட்ட உதவிகளை வழங்கி வாழ்த்தினர்.
இத்திட்டத்தின் மூலம் காரைக்கால் தெற்கு தொகுதி எல்லைக்குட்பட்ட நிர்மலா ராணி பெண்கள் அரசு உதவிபெறும் மேல்நிலைப்பள்ளி, தூய மரிய அன்னை மேல்நிலைப்பள்ளி (St. Mary’s), கோத்துக்குளம் அரசு உயர்நிலைப்பள்ளி மற்றும் முஸ்லிம் வித்யா சங்கம் அரசு உதவிபெறும் உயர்நிலைப்பள்ளி ஆகிய 4 முக்கியப் பள்ளிகளைச் சேர்ந்த மாணவ, மாணவிகள் பயனடைந்தனர். மொத்தம் 300 மாணவ-மாணவிகளுக்குப் புதிய மிதிவண்டிகளும், பருவமழைக் காலங்களில் சிரமமின்றி பள்ளிக்கு வந்து செல்ல ஏதுவாக தரமான மழைக்கோட்டுகளும் வழங்கப்பட்டன.
புதுச்சேரி அரசு பள்ளி மாணவர்களின் இடைநிற்றலைக் குறைக்கவும், தொலைதூரப் பகுதிகளிலிருந்து வரும் மாணவர்கள் குறித்த நேரத்தில் எவ்விதப் போக்குவரத்து சிரமமுமின்றி பள்ளிக்கு வரவும் தொடர்ந்து பல்வேறு நலத்திட்டங்களை முன்னெடுத்து வருகிறது. அந்த வகையில் மாணவர்களின் அடிப்படைத் தேவைகளை அறிந்து செயல்படுத்தப்படும் இத்தகைய திட்டங்கள் தங்களின் கல்வி வளர்ச்சிக்கு மிகவும் பயனுள்ளதாக அமையும் எனப் பயனடைந்த மாணவ, மாணவிகளும் அவர்களது பெற்றோர்களும் மகிழ்ச்சி தெரிவித்தனர்.
