முதலமைச்சர் ரங்கசாமி மற்றும் நாராயணசாமியை நேரில் சந்தித்த இந்தியன் ஓவர்சீஸ் காங்கிரஸ் பொதுச்செயலாளர் முகமது இர்ஷாத்!
புதுச்சேரி: புதுச்சேரிக்கு வருகை தந்த இந்தியன் ஓவர்சீஸ் காங்கிரஸின் ஐரோப்பிய பிரிவு பொதுச்செயலாளர் முகமது இர்ஷாத், முதலமைச்சர் ந.ரங்கசாமியை நேரில் சந்தித்து மரியாதை நிமித்தமாக கலந்துரையாடினார். தொடர்ந்து, புதுச்சேரி முன்னாள் முதலமைச்சரும் மூத்த காங்கிரஸ் தலைவருமான வே.நாராயணசாமியையும் அவர் நேரில் சந்தித்துப் பேசினார்.
இந்த சந்திப்புகளின் போது, புதுச்சேரியின் தற்போதைய அரசியல் சூழல், உட்கட்டமைப்பு மற்றும் பொருளாதார வளர்ச்சி, மக்களின் தேவைகள் மற்றும் எதிர்பார்ப்புகள் குறித்து விரிவாக ஆலோசிக்கப்பட்டது. அத்துடன், வெளிநாடுகளில் வாழும் புதுச்சேரி பூர்வீக மக்களுக்கும் (Global Diaspora) அவர்களது சொந்த மண்ணிற்கும் இடையேயான தொடர்புகளை மேலும் வலுப்படுத்துவது குறித்தும் விவாதிக்கப்பட்டது.
புதுச்சேரியின் தொலைநோக்கு வளர்ச்சி, அனைவரையும் உள்ளடக்கிய முன்னேற்றம் மற்றும் மக்கள் நலன் சார்ந்த எதிர்காலத்தை கட்டமைப்பதில் இதுபோன்ற ஆக்கப்பூர்வமான கலந்துரையாடல்கள் மிக முக்கிய பங்கு வகிக்கும் என இந்த சந்திப்பின் போது தெரிவிக்கப்பட்டது.
